سەردێر

فەرماندەیەكی پارتی؛ پێشمەرگە ئەركی پاراستنی بیرە نەوتییەكانی گوێریان لە ئەستۆدایە

خەڵك-
فەرماندەیەكی هێزی پێشمەرگە ڕایدەگەیەنێت ، هێزەكانی پێشمەرگە ئەركی پاراستنی بیرە نەوتیيەكانی گوێریان لە ئەستۆدایە، لە ئامادەباشیدان بۆ پاراستنی بیرە نەوتییەكان و ڕێگە بە هیچ هێزێك نادەن ، لەو بیرە نەوتیانە نزیك بێتەوە.

لیوا عیرفان حەمەخان، فەرماندەی هێزی پێشمەرگە سەر بە پارتی دیموكراتی كوردستان بۆ دەنگی ئەمریكا ڕایگەیاندووە، هێزەكانیان بەشێك لە بیرە نەوتیەكانی گوێر دەپارێزن، هەمیشە لە ئامادەباشیدان، نەك تەنها بۆ پاراستنی بیرە نەوتیەكان، بەڵكو ئەو ناوچانە سەنگەری ئێمەن و خوێنمان تێدا ڕشتووە، هەر جوڵەیەك هەبێت، ئێمە ئامادەین بۆ بەرپەرچەدانەوەی.

ڕاشیگەیاندووە، 12كم لەنێوان ئێمە و هێزە عێراقیيەكان ناوچەی موحەرەمەیە، نە ئەوان بۆیان هەیە بێنە ئەو ناوچەیە، نە ئێمەش تەجاوز دەكەین، هەرچەندە بەپێی هەندێك زانیاری، هێزەكانی حەشدی شەعبی لەو سنورە، چاویان بڕیووەتە بیرە نەوتیەكان.

ئاماژەی بۆ ئەوەشكرد، جوڵەی چەكدارەكانی داعش لە سنورەكە هەیە بە شێوەی مەفرەزەی چەكداری بۆیە هێزەكانیان سەنگەر سازیان كردووە و ئامادەن بۆ وەڵام دانەوەی هەر هێرشێك گەر بكرێتە سەریان.

ئاشكراشیكرد، ئەوانەی بەمووشەك هێرشیان كردە سەر هەولێر ، هێرشبەرەكان سەنگەری پێشمەرگەیان نەشكاندووە، ڕەنگە وەك مەفرەزەی پارتیزانی دزەیانكردبێتە سنورەكە، بۆیە گواستنەوەی چەك و تەقەمەنی و ساروخ، نازانم لە چ قۆڵێكەوە هێنراوە، ڕەنگە خەڵكیان هەبێت ، یاخود مەسەلەكە دەستی گەورەی لەپشتەوە بێت، بەڵام لەهەموو دونیا، مەفرەزەی پارتیزانی دەتوانێت بجوڵێت، تەنانەت لە وڵاتە زلهێزەكانیش.