سەردێر

ئەمریكا: مافی خۆمانە لە كات و شوێنی خۆیدا وەڵامی هێرشەكەی هەولێر بدەینەوە

كۆشكی سپی ڕایدەگەیەنێت، مافی هەیە لە كات و شوێنی خۆیدا وەڵامی ئەو هێرشە بداتەوە كە شەوی رابردوو كرایە سەر هەولێر.


جێن ساكی سكرتێری ڕۆژنامەوانیی كۆشكی سپی ئەمریكا ڕایگەیاند، ئەمریكا لەگەڵ دەسەڵاتدارانی عیراق كاردەكات بۆئەوەی بە وردی لایەنی بەرپرسیار دیاریبكەن كە مووشەكەكانیان ئاڕاستەی هەولێری پایتەختی هەرێمی كوردستان كردووە، دەشڵێت، ئەوە كاری لەپێشینەیانە.

سكرتێری ڕۆژنامەوانیی كۆشكی سپی ئاماژەی بەوەش كردووە، “ئێمە زۆر تووڕەین لەو هێرشە مووشەكییەی شەوی ڕابردوو لە هەرێمی كوردستانی عیراق”.
هاوكات ساكی ئەوەشی خستووەتەڕوو، ئەنتۆنی بلینكن، وەزیری دەرەوەی ئەمریكا لەگەڵ مەسرور بارزانی، سەرۆكی حكومەتی هەرێمی كوردستان قسەی كردووە “بۆئەوەی هاوكاری پێشكەش بكات كە هاوكاربێت لە بەدواداچوون بۆ دۆزینەوەی ئەو كەسانەی بەرپرسبوون لەم هێرشە، بەڵام هێشتا لایەنی بەرپرسیارمان بۆ دەستنیشان نەكراوە”.

لە وەڵامی پرسیاری ئەوەی كە ئایا ئەمریكا بیر لە تۆڵەسەندنەوە دەكاتەوە لە بكەرانی ئەو كارە، سكرتێری ڕۆژنامەوانیی كۆشكی سپی وتی، وڵاتەكەی مافی وەڵامدانەوەی هەیە لە كات و شوێنی دیاریكراودا، “بەڵام چاوەڕێین یەكەمجار لایەنی بەرپرسیار دیاریبكرێت”. هەروەها باسی لەوەش كرد، دیپلۆماسییەت كاری لەپێشینەی ئەمریكایە.

خەڵك – بەشی هەواڵ



هەلبژاردە

گرنگترینەکان