سەردێر

دادگای توركیا بێتاوانی یۆكسەكداغ دەسەلمێنێت

بەگوێرەی هەواڵی میدیاكانی توركیا، دادگای توركیا بەتۆمەتی سووكایەتیكردن بە ڕەجەب تەیب ئەردۆغان، سەرۆكی توركیا بێتاوانی بۆ فیگەن یۆكسەكداغ، هاوسەرۆكی پێشووی پارتی دیموكراتی گەلان دەركرد.


یۆكسەكداغ تۆمەتی ئەوەی درابووە پاڵ گوایا لەمیانی كۆنگرەیەكدا كە ڕۆژی 26ی تشرینی دووەمی 2015 ئەنجامیدابوو، سوكایەتی بەسەرۆكی توركیا كردووە، ئەمڕۆ پێنجشەممە 11ی شوباتی 2021 لە زیندانی قوجایلییەوە، بەڕێگەی ڤیدیۆ كۆنفرانس، ئامادەی دەیەمین دانیشتنی دادگای باڵای تاوانەكان بوو لە شاری ئەنقەرە.

لەكۆتایی دانیشتنەكەدا، دادگای توركیا لەبەرامبەر تۆمەتی سووكایەتیكردن بەئەردۆغان، بێتاوانی یۆكسەكداغی سەلماند.

یۆكسەكداغ لەكۆنگرەیەكدا لەساڵی 2015 ئەردۆغانی بەوە تۆمەتبار كردبوو كە پشتیوانی لە ڕێكخراوە تیرۆریستییەكان دەكات، بەهۆیەوە سەرۆكی توركیا بەتۆمەتی سوكایەتی كردن پێی، داوای یاسایی لەسەر یۆكسەكداغ تۆماركرد.

هەروەها، لە تشرینی دووەمی ساڵی 2016دا لەوكاتەی دەمیرتاش و یۆكسەكداغ هاوسەرۆكی پارتی گەلانی دیموكرات بوون، بەبیانووی لێكۆڵینەوە لەگەڵیدا، یۆكسەكداغ دەستگیر دەكرێت، گرتنەكەشی پەیوەندی بە ڕووداوە خوێناوییەكەی تشرینی یەكەمی ساڵی 2014 ەوە هەیە كە بەهۆیەوە ژمارەیەك خۆپیشاندەر بوونە قوربانی، خۆپیشاندەران داوایان دەكرد حكومەتی توركیا هەڵوێستێكی ڕوونی لەبەرامبەر تیرۆریستانی داعش هەبێت لەبەرامبەر داگیركردنی شاری كۆبانێ‌ لە ڕۆژئاوای كوردستان، لەو كاتەدا یۆكسەكداغ تۆمەتبار كرا بەوەی هانی هاووڵاتیانی كوردی داوە خۆپیشاندان بكەن و سووكایەتی بە سەرۆك كۆمار بكەن.

خەڵك – بەشی هەواڵ