سەردێر

ڕێباز بێركۆتی؛ ئومێد دەكەین پارێزگاری هەولێر بۆ هەمووان بێت

خەڵك-
سەرۆكی فڕاكسیۆنی یەكێتی لەئەنجوومەنی پارێزگای هەولێر ڕایدەگەیەنێت ، ئەمڕۆ هەرێمی كوردستان لەهەموو كات پێویستی بەیەكڕیزی و تەبایی هەیە، بۆیە ئێمە وەكو یەكێتی پێمان خۆش بوو هەڵبژاردنی پارێزگاری هاولێرلەسەر بنەمای تەوافوق بێت نەك زۆرینە و كەمینە.

ڕێباز بێركۆتی ، سەرۆكی فڕاكسیۆنی یەكێتی لەئەنجوومەنی پارێزگای هەولێر لەدوای هەڵبژاردنی پارێزگاری هەولێر ڕایگەیاند ، هەموو شاروشوێنەكان گرنگی تایبەتی خۆیان هەیە لەڕووی هەڵكەوتەی جوگرافی و مێژووی شۆڕشەكان، بەڵام هەولێریش وەك پایتەخت گرنگیەكی تایبەتی هەیە، بۆیە ئێمە وەك یەكێتی پێمان خۆش بوو هەڵبژاردنی پارێزگاری هاولێر لەسەر بنەمای تەوافوق بێت نەك زۆرینە و كەمینە.

وتیشی ،”ئەمڕۆ هەرێمی كوردستان لەهەموو كات پێویستی بەیەكڕیزی و تەبایی هەیە، بۆ ئەوەی هیچ درز و كەلێنێك نەبێت بۆ ئەوەی نەیار و دووژمنەكانمان سوودی لێ نەبینن”.

ڕاشیگەیاند، ئومێد دەكەین پارێزگاری هەڵبژێردراو پارێزگاری هەمووان بێت و ئەو كەم و كورتیانەی لە ئیدارە هەبووە یان ئەو سەرنج و تێبینیانەی هەمان بووە ئەو بارانە ڕاست بكاتەوە بەئومێدی ئەوەی خەڵكی هەولێر دڵخۆش بكات، كە لە ئارامی سیاسی ژیان بەسەر ببەن.

لەكۆبوونەوەی ئەنجوومەنی پارێزگای هەولێر، لەكۆی ٢٣ ئەندامی بەشدار لەكۆبوونەوەكە ئومێد خۆشناو بە ١٨ دەنگ بووە پارێزگاری هەولێر و یەكێتی و گۆڕان و كۆمەڵ و یەكگرتوو و دوو ئەندامی سەربەخۆ دەنگیان نەدا.