سەردێر

خاڵی سەرۆكی هەرێم كۆچی دوایی كرد

خەڵك –
بەیانی ئەمڕۆ خاڵی سەرۆكی هەرێمی كوردستان و پێشمەرگەی شۆڕشی ئەیلوول دەڤەری سلێمانی و سەردارئاغای كوڕی حەمەی ئاوڕەحمانئاغای سلێمانی و برای هاوسەری كۆچكردوو ئیدریس بارزانی بەهۆی نەخۆشیەوە كۆچی دوایی كرد.

مەسعود بارزانی ، سەرۆكی پارتی دیموكاراتی كوردستان لە پەیامێكدا بە بۆنەی كۆچی دوایی خاڵی نێچیرڤان بارزانی پرسە نامەیەكی ئاڕاستەی بنەماڵەی سەردارئاغای كوڕی حەمەی ئاوڕەحمانئاغای سلێمانی كرد ، كە بەیانی ئەمڕۆ بەهۆی نەخۆشیەوە كۆچی دوایی كرد.

ڕاشیگەیاندووە، سەردارئاغای كوڕی حەمەی ئاوڕەحمانئاغای سلێمانی كەسایەتیی دیار و نیشتیمانپەروەری كوردستان و دەڤەری سلێمانی و پێشمەرگەی شۆڕشی ئەیلوول بووە هاوكات برای خوالێخۆشبوو نازدارخانی خێزانی ڕەحمەتی كاك ئیدریس بوو .

پەیامێك لە سەرۆك بارزانی
بەناوی خودای بەخشندە و میهرەبان
بەداخێكی زۆرەوە سەرلەبەیانیی ئەمڕۆ یەكشەممە ٧ـی شوباتی ٢٠٢١ كەسایەتیی دیار و نیشتیمانپەروەری كوردستان و دەڤەری سلێمانی و پێشمەرگەی شۆڕشی ئەیلوول، سەردارئاغای كوڕی حەمەی ئاوڕەحمانئاغای سلێمانی و، برای خوالێخۆشبوو نازدارخانی خێزانی ڕەحمەتی كاك ئیدریس ، ئەمری خودای گەورەی بەجێ گەیاندووە و بە هۆی نەخۆشییەوە كۆچی دوایی كردووە.
وێڕای سوپاسگوزارییم بۆ هەموو خەڵكی خۆشەویستی كوردستان، بەهۆی پەتای كۆرۆنا و پابەندبوون بە ڕێنماییە تەندروستییەكان و لەپێناو سەلامەتیی هاووڵاتیان، پرسەی خوالێخۆشبوو سەردارئاغا بەڕێوە ناچێت.
لە خودای مەزن داواكارم سەبر و ئارامی بە هەموو لایەك بدات و خوالێخۆشبووش بە بەهەشتی بەرین شاد بكات.
انا للە و انا الیه راجعون
مسعود بارزانی
٧ـی شوباتی ٢٠٢١