سەردێر

دەستەی گەشتوگوزار وۆركشۆپێكی بەڕێوەبرد

یەكەم وۆركشۆپی دەوڵەمەندكردنی ڕەشنووسی یاسای پەرەپێدانی گەشتوگوزار بەڕێوەچوو.


دەستەی گشتی گەشتوگوزاری هەرێم لە ڕاگەیەنراوێكدا بڵاویكردەوە، ئەمڕۆ 3/2/2021 لە شاری هەولێر یەكەم وۆركشۆپی دەوڵەمەندكردنی ڕەشنووسی یاسای پەرەپێدانی گەشتوگوزاری هەرێمی كوردستان بە ئامادەبوونی نوێنەری زۆربەی وەزارەتەكان و ژمارەیەك دادوەر و ژمارەیەك مامۆستای شارەزای زانكۆ و ژمارەیەك وەبەرهێنەر و بەڕێوەبەرانی گشتی گەشتوگوزاری شارەكان و بەڕێوەبەرانی دیوانی دەستە لەلایەن دەستەی گەشتوگوزار ڕێكخرا.

لە ڕاگەیەنراوەكەدا ئەوەش خراوەتەڕوو، سەرەتا سەرۆكی دەستەی گشتی گەشتوگوزار ئەمەل جەلال وتەیەكی كورتی پێشكەش كرد و باسی گرنگی ڕەشنووسە ئامادەكراوەكەی كرد، ئاماژەی بە پێویستی یاسا بۆ گەشتوگوزاری هەرێم كرد و ئاماژەی بە پاڵپشتی وەزیری شارەوانی و گەشتوگوزار و لیژنەی پەرلەمان و لایەنەكان دا كە مەبەستیانە یاساكە دەربچێت و كاریان بۆی كردووە.

دەستەی گشتی گەشتوگوزار ئاماژەی بەوەشدا، دواتر ماددە و بڕگەكانی یاساكە خوێندرانەوە و لە لایەن ئامادەبووان دەست بە گفتوگۆ كرا و تێبینیەكنیان خستەڕوو.

خەڵك – بەشی هەواڵ