سەردێر

هاووڵاتییەكی ڕۆژهەڵات بە 26 كیلۆ ماددەی هۆشبەرەوە دەستگیركرا

خەڵك-
هاووڵاتییەكی ڕۆژهەڵاتی كوردستان بە 26 كیلۆ ماددەی هۆشبەرەوە دەستگیركرا و بەڕێوەبەرایەتی نەهێشتنی ماددەی هۆشبەر ئاشكرای دەكات، تۆمەتبارەكە پەڕاوی لێكۆڵینەوەی بۆ كراوەتەوە.


بەڕێوەبەرایەتی نەهێشتنی ماددەی هۆشبەر لە ئاسایشی هەولێر لە ڕاگەیەنراوێكدا ئاماژەی بەوەكردووە، شۆفێرێكی بارهەڵگری ئێرانی بەناوی (ا.ر.م) بە 26 كیلۆ ماددەی هۆشبەرەوە دەستگیركراوە، كە 16 كیلۆ لەو ماددە هۆشبەرە كریستاڵ و 10 كیلۆكەی دیكەش تلیاك بووە.

ڕاشیگەیاندووە، تۆمەتبارەكە بەپێی ماددەی 14ی یاسای ماددە هۆشبەرەكان پەڕاوی لێكۆڵینەوەی بۆ كراوەتەوە و دراوەتە دادگا، لێكۆڵینەوەش لەگەڵی بەردەوامە.

ئاشكراشی كردووە، لە ماوەی ئەم مانگەدا توانیویانە زیاتر لە 12 تۆمەتبار دەستگیربكەن، كە 27 كیلۆ و 727 گرام ماددەی هۆشبەریان هێنابووە نێو هەرێمی كوردستان.