سەردێر

گەشتی عومرە دەستپێدەكاتەوە و مەرجی نوێ‌ دیاریكرا

خەڵك-
وڵاتی سعودیە بە مەرج و ڕێكاری نوێ‌ ڕێگای بۆ ئەنجامدانی عومرە بۆ بەشێكی زۆری وڵاتان و لەنێویشیاندا عیراق و هەرێمی كوردستان كردەوە و وەزارەتی ئەوقافی هەرێمیش دەڵێت: “تا بە فەرمی دەستپێكردنەوەی گەشتەكان ڕانەگەیەنن پارە بە هیچ كۆمپانیایەك نەدەن”.

نەبەز ئیسماعیل، وتەبێژی وەزارەتی ئەوقاف و كاروباری ئایینی حكومەتی هەرێم بە (خەڵك) ڕاگەیاند، وڵاتی سعودیە بە مەرج و ڕێكاری قورس ڕێگای بۆ دەستپێكردنەوەی گەشتی عومرە بۆ زۆربەی وڵاتان و لەنێویشیاندا عیراق كردۆتەوە.

ڕاشیگەیاند، مەرجی ئەنجامدانی گەشتی عومرە لە ئەمساڵدا پەیڕەوكردنی ڕێكارە تەندروستییەكانی تایبەت بەكۆرۆنایە و لەوچوارچێوەیەشدا هەر عومرەكارێك دەبێت لەگەڵ داخڵبوونی بۆ سعودیە (3) ڕۆژ كەرەنتین بكرێت”.

ئاشكراشی كرد، “هەر كاتێك لیژنەی باڵای ڕووبەڕووبوونەوەی كۆرۆنا لە هەرێم بڕیاریدا بە دەستپێكردنەوەی گەشتی عومرە، هاووڵاتیانی هەرێم دەتوانن گەشتی عومرە بكەن و ئەو كاتەش ئێمە وەكو وەزارەتی ئەوقاف بە فەرمی ڕایدەگەیەنین”.

نەبەز ئیسماعیل، داواشی لە هاووڵاتیان كرد، “لە ئێستادا پارە بە هیچ كۆمپانیایەكی تایبەت بە عومرە نەدەن تا بەفەرمی كاتی دەستپێكردنەوەی گەشتی عومرە بڵاودەكەنەوە و ئەو كۆمپانیایانەش ئاشكرادەكەن، كە بە فەرمی مۆڵەتیان پێ‌ دراوە”.