سەردێر

نێچیرڤان بارزانی پەیامێك بۆ كۆبانێ‌ دەنێرێت

خەڵك-
سەرۆكی هەرێمی كوردستان بەبۆنەی ساڵیادی ڕزگاركردنی كۆبانێ‌ لەدەست چەكدارانی داعش پەیامێك بڵاودەكاتەوە و ڕایدەگەیەنێت، لەم یادەدا سەرمان لەبەردەم گیانی پاكی شەهیدان دادەنوێنین.

نێچیرڤان بارزانی، سەرۆكی هەرێمی كوردستان لە پەیامەكەیدا ئاماژەی بەوەكردووە، یادی داستانی ئازادكردنی كۆبانێ لە تەواوی گەلی كوردستان و هەموو ئازادیخوازانی جیهان پیرۆز دەكەم.

ڕاشیگەیاندووە، لەم یادەدا سەرمان لەبەردەم گیانی پاكی شەهیدان دادەنوێنین، بە ڕێز و وەفادارییەوە یادیان دەكەینەوە.

دەشڵێت: “سوپاسی هێزەكانی هاوپەیمانان دەكەین، كە لە شەڕی دژی تیرۆردا، هاوكارمان بوون”.

ئەمڕۆ 6 ساڵ تێدەپەڕێت بەسەر 26-1-2015، كە تێیدا كۆبانێ‌ لە ڕۆژئاوای كوردستان دوای بەرخودانێكی چەند مانگی و بە پاڵپشتی هێزی پێشمەرگەی كوردستان و هێزی هاوپەیمانان لەدەست چەكدارانی ڕێكخراوی تیرۆرستی داعش ڕزگار كرا.