سەردێر

سەركردە دەستلەكاركێشاوەكانی كۆمەڵ بەشداری هەڵبژاردنەكان دەكەن؟

خەڵك-بەشی هەواڵ

سەركردەیەكی دەستلەكاركێشاوەی كۆمەڵی ئیسلامی ڕایدەگەیەنێت، تاكو ئێستا یەكلایی نەبووینەتەوە لەوەی بەشداری هەڵبژاردنەكان بكەین.

ئیسماعیل ڕەسوڵ، ئەندامی دەستلەكاركێشاوەی كۆمەڵی ئیسلامی بە (خەڵك)ی ڕاگەیاند، تاكو ئێستا بابەتی بەشداریكرنمان لە هەڵبژاردنەكان یەكلانەبۆتەوە، چونكە ئەو هەڵبژاردنەی عیراق یاساكەی گۆڕداوە و بەدڵنیاییەوە لە بەرژەوەندی حزبی بچوكدا نییە سەڕەرای ئەوەی وەك گروپێك بەشداری بكەیت.

وتیشی، “ئەگەر بەرەیەكی فراوان دروست ببێت لەوانەیە ئەوكات مەجالی گفتوگۆی هەبێت، ئەو بەرەیەش بەدەر لە حزبەكانی دەسەڵات و ئەوانەی لە حكومەتدان لە هەرێم”.

ئاشكراشیكرد، پێمانباش بوو بەرەیەكی لەو شێوەیە هەبێت، گرفت ئێمەش نین، گرفتەكە ئەو خەڵكەیە كە بە دۆخێكی خراپدا تێپەڕ دەبێت، كە بەشێكی زۆری حزبەكانی دەسەڵات لە هەرێم دروستیان كردووە.

ڕوونیشیكردەوە، ڕاستە عێراق لە قەیرانێكی سیاسی و داراییدایە، بەڵام ئەوەی زیاتر پەیوەندی بە هەرێمەوە هەیە بۆ ئێمە گرنگترە، هەڵبژاردنەكانیش لە ئێستادا دواخراوە و گومانیش هەیە ئەو كاتەی بۆی دیاری كراوە ئەنجام بدرێت.

ساڵی 2019 ژمارەیەك لە سەركردە و كادیری پێشكەوتووی كۆمەڵی ئیسلامی بەهۆی ڕازینەبوون بە كاروباری سیاسی نێو حزبەكەیان دەستیان لەكاركێشایەوە.