سەردێر

ئاسایشی سلێمانی باندێكی دەستگیركرد

خەڵك- بەشی هەواڵ
بەڕێوەبەرایەتی نەهێشتنی ماددە هۆشبەرەكان لە ئاسایشی سلێمانی، دەستگیركردنی باندێكی قاچاخچی ماددە هۆشبەرەكان لە شاری سلێمانی و دەستبەسەرداگرتنی زیاتر لە 13 كیلۆگرام ماددەی هۆشبەر لە جۆری تلیاك ڕادەگەیەنێت.

ئەمڕۆ پێنج شەممە، عەمید پشتیوان بەهائەدین، بەڕێوەبەری نەهێشتنی ماددە هۆشبەرەكان لە ئاسایشی سلێمانی، لە كۆنفرانسێكی ڕۆژنامەوانیدا ڕایگەیاند: “دوای كۆكردنەوەی زانیاریی ورد سەبارەت بە باندێكی بەقاچاخبردنی ماددە هۆشبەرەكان، لە ئۆپەراسیۆنێكی هاوبەشی بەڕێوەبەرایەتیی بازگەكان و ئاسایشی سلێمانی توانیمان دەستبەسەر بڕی زیاتر لە 13 كیلۆ ماددەی هۆشبەر لە جۆری تلیاك بگرین، كە لەنێو ئامێری بەرزكەرەوە (رافعە)دا شاردرابووەوە”.

پشتیوان بەهائەدین دەڵێت:” بەپێی ئەو بەدواداچوون و زانیارییانەی دەستیان كەوتووە، ئەو باندە بەنیازبوون ئەو ماددە هۆشبەرە ببەنە دەرەوەی هەرێمی كوردستان و لە چەند كەسێك پێكهاتوون كە خەڵكی هەموو شوێنێكی تێدایە، بەهۆی ئەوەی چەند كەسێكیان ماوە دەستگیر بكرێن، بۆیە جارێ ئاشكرایان ناكەین”.

بەپێی ئامارەكانی بەڕێوەبەرایەتی نەهێشتنی ماددە هۆشبەرەكان لە ئاسایشی سلێمانی لە سەرەتای ساڵی 2020وە تا 12ی ئەم مانگە، 257 پەڕاوی لێكۆڵینەوە بۆ ئەو كەسانە كرداونەتەوە كە بەكارهێنەر و بارزگانییان بە ماددە هۆشبەرەكان كردووە، لەو 257 پەڕاوەش 262 كەس زیندانی كراون كە بەشێكیان ڕەوانەی دادگا كراون و بەشێكشیان بە بڕیاری دادوەر دوای ماوەیەك لە پشكنین و بەدواداچوون كە دەركەوتووە هیچیان لەسەر نەبووە، ئازادكراون، 138 كەسیش لە قۆناخی لێكۆڵینەوەدان و هەندێكیان ڕەوانەی دادگا كراون.