سەردێر

دەزگای گشتی كاروباری مین ئاماری كاروچالاكییەكانی 2020ی بڵاوكردەوە

دەزگای گشتی كاروباری مین ئاماری كاروچالاكییەكانی 2020ی بڵاوكردەوە

خەڵك- بەشی هەواڵ
دەزگای گشتی كاروباری مین ئاماری كاروچالاكییەكانی 2020ی بڵاوكردەوە و ڕایدەگەیەنێت،
بەراود بە ساڵی پار كاروبەرهەمی بەهۆی پەتای فایرۆسی كۆڕۆنا و قەدەغەی هاتووچۆ و قەیرانی دارایی لە ڕووبەری پاككراو و ژمارەی مین و تەقەمەنی لەناوبراو ڕووی لە كەمی كردووە.

جەبار مستەفا ، سەرۆكی دەزگای گشتی كاروباری مین ئەمرۆ 18ی كانونی دووەمی 2021 لە كۆنگرەیەكی رۆژنامەوانیدا ئاماری كاروچالاكیەكانی 2020ی بڵاوكردەوە و ڕاگەیاند، لە ساڵی ڕابردوودا توانراوە 360 هەزارو 696 مەتر دووجا، لە مین و تەقەمەنی پاك بكرێتەوە.

وتیشی ،” كە (4)كێڵگە مین و ڕووبەری (679،386) شەڕگە دەگرێتەوە ، دوای پاككردنەوەشی ڕادەستی خاوەنەكانیان كراوەتەوە ، لە ئێستادا دەتوانرێت بۆ كاری ئاژەڵداری و كشتوكاڵ و گەشتوگوزارو پرۆژەی ئابووری و وەبەرهێنان بەكار بهێندرێت”.

ڕاشیگەیاند، ژمارەی ئەو مین و تەقەمەنیانەی، كە لەرێگەی تیمەكانی مینلابەری دەزگاكە و ڕێكخراوەكانەوە لە ناوبراون و هەڵگیراونەتەوە بە 8 هەزار 489 مین و تەقەمەنی مەزەندە دەكرێت ، كە مینی دژەكەسی و دژە تانك و تەقەمەنی سەرپێی(IED) و پاشماوەی جەنگی لەخۆ گرتووە، كە هەر مین و تەقەمەنیەك مەترسی بووە بۆ سەر گیانی چەندین هاووڵاتی و گیان لەبەران.

ئاماژەی بۆ ئەوەشكرد، بەهۆی كەرەنتینە و ڤایرۆسی كۆڕۆنا و قەیرانی دارایی بەرهەمی دەزگا لە پاككردنەوەی خاكی كوردستان لە مین و تەقەمەنی زۆر كەمی كردووە و پلانی ئەوساڵەمان داناوە كاروبەرهەم زۆر زیاد بكەین و كە جێگەی ڕەزامەندی هاووڵاتیان و ئێمەش بێت.

ئاشكراشیكردووە، لە ساڵی2020 بەهۆی مین وتەقەمەنیەوە (18)بەركەوتوو بە رووداوەكانی مین و تەقەمەنی تۆمار كراوە، كە لەو ژمارەیە بەداخەوە (10)دە كەس گیانیان لەدەستداوە و (8)ی تریش بریندار و كەم ئەندام بوون.

هەر لە كۆنگرە رۆژنامەوانیەكەدا

عوبێد ئەحمەد، بەرێوەبەری گشتی كاروباری تەكنیكی رایگەیاندووه،  لەوساڵە دا توانراوە لە رێگەی بەرێوەبەرایەتی هۆشیاركردنەوە، نزیكەی لە (23)بیست و سێ هەزار كەس سودمەندبن لە بەرنامەی هۆشیاركردنەوە، كە دەزگای مین بە بەردەوامی لە گوند و ئاواییەكان رێنمایی بۆ خەڵك بڵاودەكاتەوە كە نزیكی ناوچە مەترسیەدارەكان نەكەون بۆ ئەوەی ژیانیان پارێزراو بێت لە مەترسیەكانی مین و تەقەمەنی” ناوبراو ئەوەشی خستە روو كە ژمارەی چاودێرانی دڵنیایی جۆری بۆ كێڵگە مینەكان بریتی بووە لە 361سەردانی كردن بەمەبەستی پابەندبوونی مینلابەران و پاراستنی گیانیان لە مەترسیەكانی مین و تەقەمەنی و روداوی نەخوازراو.

جێگەی ئاماژەیە رووبەری پیس بوو بە مین و تەقەمەنی لە كوردستان زیاد لە 2,776,000 مەتر دووجا بووە، دەزگای گشتی كاروباری مین بەهاوكاری رێكخراوە ناوخۆیی و نێو دەوڵەتیەكان توانیوویەتی رووبەرێكی فراوان پاك بكاتەوەو تەنها 257,000,000 مەتر دووجا ماوە پاكبكرێتەوە تیمەكانی مینلابەری رۆژانە بەبەردەوامی كاری پاكسازی لە كێڵگە مینەكان دەكەن بۆ پاككردنەوەی خاكی كوردستان لە مەترسیەكانی مین و تەقەمەنی و پاراستنی گیانی هاوڵاتیان.

 



هەلبژاردە

گرنگترینەکان