سەردێر

سەعید گاباری.. دەنگی شۆڕش ‌و ئەڤین

خەڵك-
سەعید گاباری هونەرمەندی گەورەی كوردستان، لەڕێی هونەری مۆسیقا‌و گۆرانییەوە، خزمەتێكی زۆری گەلی كوردستانی كردووە.

خاوەنی (4712) گۆرانی‌و لاوك‌ و مەقامی هەمەجۆری نیشتمانی‌و ئەڤیندارییە.

هونەری ئەو بەتەنها بۆ ئارامی رۆح‌ و دەروون نەبوو، هونەری ئەو چەكی شۆڕشگیڕانەی ڕابوون‌ و بێداركردنەوەی گەلەكەی بوو لەدژی داگیركەرانی كوردستان، هەر بۆیە دوژمنان لەدەنگی دلێری دەترسان‌ و لەهیچ پارچەیەكی كوردستانی بندەست جێگەی نەدەبۆوە، لەبەرئەوە چووە شاخ ‌و سەنگەری پێشمەرگە لەئامێزی گرت.
سەعید گاباری ساڵی 1956 لەگوندی (خربێ‌ كەژێ‌)ی سەر بەشارۆچكەی حەسەكەی رۆژئاوای كوردستان لەدایك بووە.

لەتەمەنی 8 ساڵیدا بینایی چاوەكانی لەدەست دا، بەڵام رووناكی هونەر چا‌و‌و دڵی رۆشن كردەوە.
ئەو هەر لەسەرەتای گەنجییەوە شەیدای هونەری گۆرانی‌ و ئامێری تەمبور بوو، ژیانی ژێر دەستەیی وێڵی دوای ئازادی كرد‌و شیعرە شۆڕشگێڕییەكانی (جگەر خوێن ‌و سەیدا تیرێژ) رێگای خەبات‌ و ئازادییان نیشاندا، ئیدی شیعری ئەوانی كردە ستران‌ و سروود، گۆرانییەكانی بەگشتی‌ و گۆرانی (بولبولی دڵشاد) بەتایبەتی دەنگدانەوەی زۆری هەبوو، عەرشی داگیركەرانی لەرزاند، هەربۆیە خستیانە زیندانەوە ‌و وەك خۆی باسی دەكات ئازاری وەحشیانە درا. دوای ئازادبوونی نەیتوانی لەرۆژئاوا بمێنێتەوە.

ساڵی 1978 هاتە باشوری كوردستان‌ و شاری هەولێر ئامێزی خۆشەویستی بۆ كردەوە. ئیدی لەهەولێرەوە لەگەڵ كاروانی هونەر رێی كرد. لەگەڵ چەند هونەرمەندێكی دیكەدا تیپی هونەری میللی هەولێریان دامەزراند، لەرێی ئەو تیپەوە بە گۆرانی ‌و لاوك‌ و مەقام خزمەتی زۆری هونەری كوردی كرد. ئیتر چالاكی ‌و هونەرەكەی لەهەولێریش بووە جێی سەرنجی پیاوانی ڕژێمی بەعس‌ و لەدژی وەستانەوە. هەربۆیە لە ساڵی 1980 ڕووی كردە چیاو سەنگەری بەرگری هەڵبژارد‌ و بووە ئەندامی تیپی هونەری شۆڕش، دەنگە دلێرەكەی لەپاڵ چەكی شانی پێشمەرگەدا لەدژی ڕژێمی بەعس چووە سەنگەرەوە، بەدەنگی بڵندی گیانی خەبات‌و بەرخودانی جۆش دا‌و تاراپەڕین لەشاخ بەردەوام بوو.

دوای راپەڕین چووە دەرەوە ‌و لە وڵاتی ئەڵمانیا بووە پەناهەندە، لەوێش لەڕێی هونەرەكەیەوە خزمەتی كرد.

لەكاتی شەڕی داعش لەدوورە وڵات ئۆقرەی نەگرت ‌و هاتەوە كوردستان‌، بەچەكی هونەری گۆرانی ‌و بەكلیپێك دژی بیری تاریكی وەستایەوە.
ئەم هونەرمەندە مەزنەی كوردستان، نیوسەدە لەژیانی خۆی خستە خزمەت هونەر ‌و نیشتمانەكەیەوە، خاوەنی (4712) گۆرانی‌و لاوك‌ و مەقامی هەمەجۆری نیشتمانی‌و ئەڤیندارییە.بەوەش خاوەنی زۆرترین بەرهەمی هونەرییە.

دوای خزمەتێكی زۆر بەگەل‌ و نیشتمانەكەی‌ و كاروانی هونەری كوردی، بەرەبەیانی 4ی ئایاری 2020 لەنەخۆشحانەی سەردەم لەشاری هەولێر لەتەمەنی 64 ساڵیدا كۆچی دوایی كرد‌و چووە ریزی نەمرانی هونەرەوە. لەسەر راسپاردەی خۆی ‌و لەخۆشەویستی بۆ هەولێر، لە گۆڕستانی مەلا ئۆمەر بە خاك سپێردرا.





هەلبژاردە

گرنگترینەکان