سەردێر

خۆڵبارینەكەی ئەمڕۆ ئەم ناوچانە دەگرێتەوە

خەڵك-
حسێن ئەسەدی كەشناسی عیراقی پێشبینی دەكات، شەپۆلەكانی خۆڵبارین بەردەوامبن و لەمڕۆ هەینیشدا ئەو شەپۆلانە چڕترببنەوە، چاوەڕوانیش دەكرێت پلەكانی گەرما لە شەممەی داهاتووەوە ڕوو لە دابەزین بكەن.

بەپێی نوسراوێك كە لەلایەن ئەسەدییەوە لەسەر تۆڕی كۆمەڵایەتی فەیسبوك بڵاوكرایەوە”شەپۆلەكانی خۆڵبارین بەردەوام دەبن بەهۆی چالاكی با كە لە باكووری خۆرئاواوە هەڵدەكات كە لەمڕۆ هەینیدا دەبێتە مایەی دروستبوونی خۆڵبارین لە بەغدا و ناوچەكانی باشوور”.

بە وتەی ئەسەدی”خۆڵبارین واست و میسان دەگرێتەوە، خێرایی با دەگاتە 75 كیلۆمەتر لە كاتژمێرێكدا، پێشبینی دروستبوونی پەڵە هەوریش دەكرێت لە ناوچەكانی باشوور، وێڕای دروستبوونی خۆڵبارین لە سەرلەئێوارەی هەینی لە باشووری موسڵ و سەڵاحەدین”.

ئەو كەشناسە عیراقییە پێشبینی دەكات”خۆڵبارینەكە ڕوو لە كەركوك و بەغدای پایتەخت و دیالە و پاشان واست بكات كە لەنێوان سوك و مامناوەنددا دەبێت، ڕەنگە هەندێك چڕیش بەخۆوە ببینێت، بە تایبەت لە سەڵاحەدین”.

ئەسەدی پێیوایە، پلەكانی گەرما دادەبەزن لە شەممەی داهاتووەوە، ئەمەش چەند ڕۆژێك بەردەوام دەبێت.