سەردێر

بەهۆی نەبوونی سووتەمەنییەوە ژینگەی سۆران مەترسی لەناوچوونی لەسەرە

خەڵك – نزار مستەفا

ساڵانە لەگەڵ نزیكبوونەوەی وەرزی سەرما، بەهۆی كەمی سووتەمەنییەوە دارێكی زۆر لە ناوچە شاخاوییەكانی ناوچەی سۆران دەبڕدرێنەوە، بەمەش ژینگەی ناوچەكە بەرەو لەناوچوون دەچێت.
سیروان مزوری كارگێری ڕێكخراوی وار بۆپاراستنی ژینگە لە سۆران بە (تۆڕی میدیایی خەڵك)ی ڕاگەیاند؛ ‎ِرێكخراوی وار بۆ پاراستنی ژینگە ساڵانە پێش هاتنی وەرزی سەرما و سۆڵە هۆشداریی دەداتە حكومەت، تا زوو دەستبكەن بە دابەشكردنی سووتەمەنی و ژینگەی كوردستان لە وێرانكاری و لەناوچوون بپارێزن، چونكە داربڕین دەست پێدەكات لە ناوچە شاخاوییەكان.

سیروان مزوری ئاماژەی بەوەشداوە، ساڵانە لەم كاتەدا نرخی نەوت بەرزدەبێتەوە و بە بەرزبوونەوەی نرخ و دابەشنەكردنی نەوت، ڕێژەیەكی زۆر لە دار و درەخت بەهۆی نەبوون و گرانی سووتەمەنی دەبڕدرێنەوە.

كارگێری ڕێكخراوی وار بۆپاراستنی ژینگە لە سۆران وتیشی: بەرمیلێك نەوت بەشی هیچ ناكات لە ناوچە شاخاوییەكان، بەتایبەت لەم وەرزەدا كە زۆر ساردە و هاووڵاتیان پێویستش بەڕێژەیەكی زۆری نەوت هەیە تا بتوانن بەرگەی سەرما بگرن، بۆیە داواكارین حكومەت ساڵانە ڕێژەی دابەشكردنی نەوت زیاد بكات پێشی هاتنی وەرزی سەرما بۆ ئەوەی خەڵك پەنا نەبەنە بەر داربڕین و ژینگە وێران نەكەن.