سەردێر

دەستەی ژینگە: ئەو پارەیەی هاتووچۆ لەشۆفێرانی وەردەگیرێت ناگەڕێتەوە دەستەكەمان

خەڵك

وتەبێژی دەستەی چاككردن و پاراستنی ژینگە جەخت لەوەدەكاتەوە، رسوماتی ژینگە كە لە شۆفێران وەردەگیرێت بەشێكی ڕەوانەی وەزارەتی دارایی و بەشێكی ڕەوانەی بەڕێوەبەرایەتییەكانی هاتوچۆ دەكرێت و نازانن بڕی ئە ورسوماتە چەندە.


ئەحمەد محەمەد وتەبێژی دەستەی چاككردن و پاراستنی ژینگە بە ماڵپەڕی فەرمی یەكێتی ڕاگەیاندووە: ئەو رسوماتەی ساڵانە لە بەڕێوەبەرایەتییەكانی هاتووچۆ بەناوی ژینگەوە لە شوفێران وەردەگیرێت ناگەڕێتەوە بۆ ئەوان و دەگەڕێتەوە بۆ گەنجینەی وەزارەتی دارایی و بەشێكیشی بۆ بەڕێوەبەرایەتییەكانی هاتووچۆ دەبێت.

وتەبێژی دەستەی چاككردن و پاراستنی ژینگە وتیشی: وەكو دەستەی ژینگە نازانن بڕی ئەو رسوماتە چەندە كە ساڵانە لە شوفێران بەناوی ژینگەوە لە بەڕێوەبەرایەتییەكانی هاتووچۆ وەردەگرێت.

ئەحمەد محەمەد ئاماژەی بەوەشدا: : 80% ی ئەو داهاتە دەگەڕێتەوە بۆ گەنجینەی وەزارەتی دارایی و 20% ی بۆ بەڕێوەبەرایەتییەكان هاتووچۆ دەبێت، بۆیە ئەوان داواكارن ئەو رسوماتە بەناوی ژینگەوە لە شوفێران وەرنەگیرێت و بەناوێكی تر وەربگیرێت.

وتەبێژی دەستەی چاككردن و پاراستنی ژینگە باسی لەوەشكرد، بە پێی یاسا هەركەسێك سەرپێچی ژینگەیی بكات بە بڕێك پارە سزا دەدرێت كە بڕەكەی لە 100 هەزار تا دە ملیۆن دینار لە دەسەڵاتی سەرۆكی دەستەی پاراستن و چاككردنی ژینگەدایە لە سەرپێچیكاری وەربگرێت، لە دە ملیۆن تا 200 ملیۆن دیناریش سەرپێچیكار دۆسیەكەی دەچێتە دادگا و دادگا بڕیاری لێدەدات.

بەپێی ئامارێكی دەستەی چاككردن و پاراستنی ژینگە لە ساڵی 2020 دۆسیەی سكاڵاكانی دەستەی پاراستن و چاككردنی ژینگە بریتی بووە لە 655 سكاڵا لە هەریەك لە پارێزگاكانی هەولێر و دهۆك و سلێمانی و ئیدارەی گەرمیان و ڕاپەڕین.

هەروەها، كۆی ئەو پڕۆژانەی لە ماوەی ساڵی 2020 پابەندی ڕێنماییەكانی ژینگە نەبوون و سزادراون بریتین لە 33 پڕۆژە و كۆی گشتی پێ بژاردن بۆ خاوەن پڕۆژەكان كە پابەندی ڕێنماییەكانی ژینگە نەبوون لە ساڵی2020 بریتی بووە لە 76 ملیۆن و 464 هەزار دینار.