سەردێر

ڕەشەبایەكی بەهێز و سارد بەشێكی ناوچەكانی هەرێم دەگرێتەوە

خەڵك-
بەپێی پێشبینییە كەشناسییەكان، لە سبەینێوە شەپۆلێكی بەهێزی با (ڕەشەبا) ناوچەكانی هەرێمی كوردستان بەتایبەتی ناوچە شاخاوییەكان دەگرێتەوە و پلەكانی گەرما ڕوو لە دابەزین دەكەن.

ئاراس جەبار، شارەزای كەشناسی بۆ (خەڵك) ئاماژەی بەوەكرد، پێشبینی ئەكەین لە بەرەبەیانی سبەینێ چوار شەممەوە ٢٤-٢-٢٠٢١ خێرايی با سەرەتا لە ناوچە شاخاوییە سنووريیەكانەوە بە ئاڕاستەی ناوچە جیاجیاكانی ھەرێمی كوردستان چالاك ببێت، كە خۆی لە بایەكی توند و ساردی وشكدا ئەبینێتەوە.

ڕاشیگەیاند، ئاڕاستەی با لە باكوری ڕۆژھەڵات ئەبێت و خێراییەكەی لەنێوان ٢٠ تا ٤٠ كیلۆمەتر لە كاتژمێرێكدا ئەبێت و لە سەرجەم ناوچە شاخاوییە سنووریيەكانی ھەرێمدا كاریگەری ئەم بایە توند و چالاك ئەبێت.

ڕوونیشی كردەوە، لەكاتەكانی ئێوارەدا كاریگەريیەكانی زیاتر ئەبێت و ناوچەكانی سنووری پارێزگای سلێمانی و ئیدارەی ڕاپەرین و كۆیە ئەگرێتەوە تا سنوری پارێزگای كەركوك و ئیدارەی گەرمیان كاریگەریەكانی درێژ ئەبێتەوە، بەڵام لە سنوری پارێزگای ھەولێر و دھۆك و ھەڵەبجە پێشبینی ئەكەین زیاتر لە ناوچە شاخاوییەكانیاندا چالاكی با توند بێت و لەناوچە نزمەكاندا كاریگەری كەم دەبێتەوە بەو ڕادەیە چالاك نابێت.

ئەو شارەزایەی كەشناسی دەشڵێت: “تا بەرەبەیانی ڕۆژی شەممە ٢٧-٢-٢٠٢١ ئەم ئاڕاستە بایە بە چالاكی ئەمێنێتەوە و پلەكانی گەرما لەو چەند ڕۆژەدا بەتێكڕای ٢-٤ پلەی سیلیزی نزمدەبنەوە”.

ئاراس جەبار هۆشداری ئەوەش دەدات، كە لەكاتەكانی شەودا كاریگەری زیادبوونی خێرایی با زیاتر ئەبێت وەك لەكاتەكانی ڕۆژ و ڕەنگە زیانیش بگەیەنێت بە شكاندنەوەی پەلی دار و درەخت.