سەردێر

شەپۆلێكی سەرماو بەفرو با رۆژهەڵاتی نێوەڕاست دەگرێتەوە

خەڵك-

وڵاتانی رۆژهەڵاتی نێوەڕاست لەگەڵ شەپۆلێكی بەهێزی سەرما و بەفر و باران و با ڕووبەڕوون.

لە خۆرئاوای میسر پلەكانی گەرما بۆ 8 پلە دابەزیون، بایەكی بەهێز هەیە، بەفر باریوە.

دەستەی چاودێری كەشناسی رایگەیاند كەناراوەكانی باكوری میسر ناسەقامگیری كەشوهەوا بەخۆیانەوە دەبینن، باران و بەفر دەبارێت.

لە لیبیا لە شاری بەیزا بەفر باریوە، بەشێك لە خزمەتگوزارییەكان راگیراون، هاووڵاتیان بۆ خۆشی دەچنە نێو بەفر.

نێوەندی نیشتمانی كەشوهەوای لیبیا دەڵێت: پلەكانی گەرما بۆ نزیك سفر دادەبەزن لە شاری بەیزا.

لە ئەردەن پلەكانی گەرما بۆ 4 دابەزیون، بەرزاییەكانی باكور بەفریان لێباریوە بەرێژەی 5 بۆ 10 سانتیمەتر.

لە سوریا بەڕێوەبەرایەتی كەشوهەوا رایگەیاند با بەهێز بووە و شەپۆلەكانی دەریا زیادیان كردووە لە دوێنێوە تا پێنج شەممە، خێرایی با دەگاتە 70 كیلۆمیتر لە كاتژمێرێكدا لە بەرزاییەكانی خۆرئاوا لەسەر كەناراوەكانی باشور و خۆرئاوا.

لە سودان دەستەی كەشوهەوا هۆشداریدا، لەو كەشوهەوا نالەبارەی حەوزی دەریای نێوەڕاست و باكوری ئەفریقای گرتووەتەوە، بەهۆی خێرایی باوە شەپۆلی خۆڵبارین دروست دەبێت مەودای بینین كەم دەبێتەوە، پلەكانی گەرما دادەبەزن.

شارەزایان دەڵێت: وڵاتانی ناوچەكە كەوتوونە ژێر كاریگەری پەستانێكی نزمەوە كە سەرچاوەكەی ماڵتایە، لەگەڵ بای جەمسەری كە سەرچاوەكەی روسیا و خۆرهەڵاتی ئەوروپایە.

هاوكات شەوی رابردوو هەرێمی كوردستان روبەڕووی بای بەهێز بووەوە، لە پارێزگای سلێمانی زیانێكی زۆری ماڵی هەبووە، دابەشكردنی كارەبای پەكخستووە، بەشێك لە رێگاوبانەكانی ئاستەنگ كردووە.

هاوكات ئەمڕۆ شەپۆلی باران بارین دەستیپێكردووە و چاوەڕێدەكرێت لە چەند رۆژی داهاتوودا بەفربارینیش لە ناوچە سنورییەكان و بەشێك لە شار و شارۆچكەكانی دیكە دەستپێبكات.