سەردێر

شەپۆلێكی بەفر و باران و سەرما هەرێم دەگرێتەوە

خەڵك-
بەپێی پێشبینییە كەشناسییەكان لەمشەوەوە شەپۆلێكی بەفر و باران و سەرما ناوچەكانی هەرێمی كوردستان دەگرێتەوە و لافاو لە چەند ناوچەیەك دروست دەبێت و شارەزایەكی كەشناسی دەڵێت: “تاوەكو ڕۆژی یەك شەممەی داهاتوو بەردەوام دەبێت”.

محەمەد كەال، شارەزای كەشناسی بۆ (خەڵك) ڕایگەیاند، بەهۆی كاریگەری ناوچەیەكی پەستان نزمی دەریای ناوەڕاستەوە پێشبینی دەكەین لەكاتەكانی ئەمشەوەوە بارانبارین سەرەتا لە سنوری پارێزگای دهۆك و دەوروبەری دەست پێبكات و لەبەرەبەیانی سبەینێ‌ چوار شەممە شەپۆلەكە دەگاتە سنوری ( هەولێر، سۆران، ڕانیە، چۆمان، قەڵادزێ، ئیدارەی ڕاپەڕین، دۆكان، سلێمانی، هەڵەبجە، كەركوك، گەرمیان) تەواوی شارەكانی تری كوردستان بەبارانێكی مام ناوەند دەست پێدەكات.

ڕاشیگەیاندووە، “سبەینێ‌ پێشبینی چڕبوونی هەورەكان دەكەین، هەربۆیە ئەگەری باران بارینی بەخوڕ هەیە لەناوچەكانی (ڕاپەڕین، سۆران، كەركوك، چەمچەماڵ، كۆیە، قەڵادزێ، ڕانیە، شیلادزێ، پیرەمەگرون، ماوەت) لەگەڵ هەورە تریشقە ئەگەری لافاوی لەناكاو هەیە لە چەم و دۆڵە نزمایەكان، بەڵام لە ناوچەكانی تر ئەگەری بارانبارینی مام ناوەند هەیە”.

ئاماژەی بەوەشكردووە، لەدرەنگانێكی شەوی چوار شەممە لەسەر پێنج شەممە ئەگەری دابەزینی بارستە هەوایەكی سارد هەیە و پلەكانی گەرما بەڕێژەی 5 بۆ 7 پلەی سیلیزی دادەبەزێ و كەش و هەوا سارد دەبێت، هەربۆیە لەدرەنگانی سبەی شەو تا نیوەڕۆی ڕۆژی یەك شەممەی داهاتوو ئەگەری بەفر بارین هەیە بۆ زۆربەی ناوچەكان و بەشێكی ناو شارەكانیش دەگرێتەوە.

ئەو شارەزایەی كەشناسی پێشبینیشی كردووە، “تاوەكو شەممەی داهاتوو ئەگەری چالاكبونی بای باشور و بای باكوری خۆرهەڵات هەیە لە دوو كاتی جیاواز، هەربۆیە هەندێك كات بایەكی زۆر بەهێز هەڵدەكات لەسەرجەم ناوچەكان بەڕێژەی 30 بۆ 48 كیلۆمەتر لە كاتژمێرێكدا و بەهۆیەوە لە 24 كاتژمێری داهاتوودا خۆڵبارین سنوری گەرمیان و كەركوك و هەڵەبجە و سلێمانی بگرێتەوە، بەڵام دواتر بەهۆی كاریگەری باران بارین كۆتایی بە خۆڵبارینەكە دێت”.