سەردێر

كۆنفرانسی ژینگە سازكرا

خەڵك- ئارام سەردار

ئەنجوومەنی باڵای ژینگە لەهەرێمی كوردستان كۆبوونەوە كە لەنوێنەری زۆربەی وەزارەتە پەیوەندیدارەكان پێكهاتووە و لەكۆبوونەوەی ئەمڕۆشیاندا لەڕێگای چەند ڕاسپاردە و پێشنیارێك ئەركی وەزارەتی ڕۆشنبیری دەستنیشان دەكرێت تاوەكو لەقۆناغی داهاتوو كاری لەسەر بكەن.

عەبدولڕەحمان سدیق، سەرۆكی دەستەی پاراستن و چاككردنی ژینگەی هەرێم و سەرۆكی ئەنجوومەنەكە ڕایگەیاند، كاركردن لەخزمەتكردن و پەرەپێدان و پاراستنی ژینگە تەنها ئەركی دەستە نییە، بەڵكو پەیوەندی بەتەواوی دامەزراوە و وەزارەت و دەستەكانی تر و هاوڵاتیانیش هەیە و هەموو لایەنە پەیوەندیدارەكانی تایبەت بە ژینگە، ئەركیان لەسەر شانە بۆ ئەوەی كار لە خزمەتی ژینگەدا بكەین.

دەشڵێت، وەزارەتی ڕۆشنبیری ڕۆڵی كاریگەری هەیە لەسەر ژینگە و هۆشیاركردنەوەی هاوڵاتیان و ئەنجامدانی كاری هونەری و ڕۆشنبیری لەچوارچێوەی خزمەتی ژینگەیی بۆ هۆشیاركردنەوە و ڕۆشنبیری تاكی كورد بەتایبەت بۆ ژینگە.

هاوكات جەمال حوسێن، نوێنەری وەزارەتی ڕۆشنبیری و لاوانی هەرێم، وتی: وەزارەتی ڕۆشنبیری 12 بەڕێوەبەرایەتی گشتی هەیە، بەڵام تائێستا یەك هەنگاومان لەوبارەیەوە نەهاویشتووە، سەڕەڕای ئەوەش ئێمه ئەركمان لەسەر شانە، بەڵام لەگەڵ ئەوەی كە هەموویان پەیڕەو و پڕۆگرامیان هەیە هیچ كامیان باسی ژینگەیان نەكردووە.

ئەوەشی خستەڕوو، لێرەین هەر ڕاسپاردە و پێنشیارێكمان پێبدرێت كاری جدی لەسەر دەكەین بۆ خزمەتی ژینگە، بەتایبەت كابینەی ئێستای حكومەت دیدگای ڕوونی بۆ گەشەی ژینگە هەیە، كاری جدی لەسەر بنەماكانی پاراستنی ژینگە دەكەین.