سەردێر

ئۆكراینا لەبەر هۆكارێك پەیوەندییەكانی لەگەڵ سوریادا دەپچڕێنێت

خەڵك-
وەزارەتی دەرەوەی ئۆكراینا، پچراندنی پەیوەندییە دیپلۆماتییەكانی لەگەڵ حكومەتی سوریادا ڕادەگەیەنێت، هۆكاری ئەمەش بۆ داننانی دیمەشق دەگەڕێتەوە بە سەربەخۆیی دوو ناوچە لە ئۆكراینا.

بەپێی بەیاننامەیەك كە لەلایەن وەزارەتی دەرەوەی ئۆكرایناوە بڵاوكرایەوە”بڕیاری داننان بە سەربەخۆیی بەناو كۆمارەكانی دۆنێتسك و لوهانسك لە ئۆكراینا لەلایەن حكومەتی دیمەشقەوە كە بەشێوەیەكی كاتی داگیركراوە، مەحكوم دەكەین”.

هەر لە بەیاننامەكەدا هاتووە”ئەو بڕیارەی حكومەتی سوریا لەلایەن ئۆكرایناوە بە كردەوەیەكی نادۆستانە و پێشێلكردنێكی ئاشكرای پەیماننامەی نەتەوە یەكگرتووەكان و پرەنسیپ و بنەما سەرەكییە نێودەوڵەتییەكان دادەنرێت، گومانیشمان نییە لەوەی كە سووریا بە ڕێنمایی دەسەڵاتدارانی مۆسكۆ هەوڵدەدات دان بە سەربەخۆیی ناوچەكانی دۆنێتسك و لوهانسكی ئۆكراینادا بنێت كە لەلایەن هێزەكانی ڕوسیاوە داگیركراون”.

چوار شەممەی ڕابردوو، حكومەتی سوریا ڕایگەیاند كە بە فەرمی دان بە سەربەخۆیی هەردوو كۆماری دۆنیتسك و لوهانسكدا دەنێت لە ئۆكراینا كە لەلایەن ڕوسیاوە داگیركراون.