خەڵک-

کۆمپانیای مایکرۆسۆفت رایگەیاند، “هاککەرە رووسیاییەکان کە لەلایەن حکومەتی وڵاتەکەیانەوە پاڵپشتی دەکرێن، پلانێکی سیخوڕیکردنیان دروست کردووە بە مەبەستی سیخوڕیکردن بەسەر دەیان وڵاتەوە کە هاوکاریی پێشکەشی ئۆکراینا دەکەن و پاڵپشتی دەکەن لە جەنگەکەی بەرامبەر رووسیادا”.

ئەمڕۆ پێنجشەممە، براد سمیت، بەرێوەبەری جێبەجێکاری کۆمپانیای مایکرۆسۆفت، رایگەیاند، ” لەسەرەتای بەرپابوونی جەنگی نێوان  رووسیا و ئۆکرایناوە، رووسیا هەوڵیداوە لە رێگەی هاککەرەکانییەوە دەوڵەتە هاوپەیمانەکانی ئۆکراینا بکاتە ئامانج و سیخوڕییان بەسەرەوە بکات”.

وتیشی “رووسیا توانیویەتی بە رێژەی 29% سەرکەوتن بەدەستبهێنێت لەو رووەوە، بە رادەییەک نیوەی کەمینەی ئەو زانیاریانەی لەرێگەی هاککردنەوەی ئامانجی بووە، بەدەستی هێناوە”.

ئاماژەی بەوەشکرد، “لەگەڵ راگەیاندنی وڵاتانی جیهان بۆ بەرگریکردن و پاڵپشتیکردنی ئۆکراینا، دەزگا و ئاژانسە هەواڵگرییە رووسیاییەکان و  تۆڕە سیخوڕییەکانی حکومەتی رووسیا، لە دەرەوەی ئۆکراینا کیێڤیان کردووەتە ئامانج بۆ وەرگرتنی زانیاری”.

راشیگەیاند، “زۆرترین ئامانجی سیخوڕییە ئەلیکترۆنییەکانی رووسیا لە بارەی وڵاتانی ئەندامانی ناتۆ بوون، بە تایبەتی ئەمریکا و پۆڵەندا کە سەرچاوەی ناردنی هاوکارییەکانن بۆ کیێڤ”.

هەروەک ئاماژەی بەوەشکرد، “لەماوەی دوو مانگی رابردوودا سیخوڕیکردن لە لایەن رووسیاوە بەسەر دانیمارک و سوید و نەرویجدا زیادیانکردووە”.

سمیت ئاشکراشیکرد،”بەرگریی ئەلیکترۆنیی ئۆکراینا سەلماندی کە بە شێوەیەکی گشتی بەهێزترە لەو هێرشە ئەلیکترۆنییانەی رووسیا ئاراستەی کردووە، کە خۆیان لە هێرشکردنە سەر 48 ئاژانس و کۆمپانیای ئۆکراینادا بینییەوە”.