سەردێر

ئەردۆغان سكاڵا لەسەر كڵچدارئۆغڵو تۆماردەكات

خەڵك

سەرۆك كۆماری توركیا سكاڵای دژی سەرۆكی گەورەترین پارتی ئۆپۆزسیۆنی توركیا تۆماركرد و لەڕێگەی حسێن ئایدنی پارێزەریەوە داوای لێكۆڵینەوە لە لێدوانەكانی كڵچدارئۆغڵو دەكات.
كەمال كڵچدارئۆغڵو، سەرۆكی جەهەپە لە كۆبوونەوەی هەفتانەی فڕاكسیۆنی پارتەكەی لە پەرلەمانی توركیا ڕۆژی 26-10-2021 وتەكانی ڕەجەب تەیب ئەردۆغانی بە “كوشتاری سیاسی و هاندان بۆ ڕق و كینە و نانەوەی پشێوی” ناوبرد.

لە بەرامبەردا، لەسەر داوای ئەردۆغان، سكاڵا دژی كڵچدارئۆغڵو تۆماركرا و پارێزەرەكەی، سكاڵانامەكەی پێشكەشی سەرۆكایەتی داواكاری گشتی كۆماریی ئەنقەرە كرد، تێیدا داوای لێكۆڵینەوە و وەرگرتنی وتە لە كڵچدارئۆغڵو دەكات.

لە سكاڵانامەكەی ئەردۆغاندا ئاماژە بەوە دراوە، بە درێژایی ژیانی سیاسیی ئەردۆغان كە نزیك دەبێتەوە لە 50 ساڵ، بە هیچ جۆرێك لەگەڵ پەنابردنە بەر تووندوتیژی نەبووە و هەمیشە سیاسەتێكی ئاشتیخوازانە و دیموكراتییانەی گرتووەتەبەر. ئاماژە بەوەش دراوە، بە مەبەست چەند ڕستەیەك لەنێو وتارەكانی ئەردۆغان دەرهێندراون و ئامانجەكەش چەواشەكارییە.

جێی ئاماژەیە، ڕەجەب تەیب ئەردۆغان ساڵی 2014 بە سەرۆك كۆماری توركیا هەڵبژێردرا‌ و دواتریش ماددەی 299 لە یاسای ژمارە 5237ی تایبەت بە یاسای سزاكانی توركیا هەمواركرایەوە.

بەگوێرەی بڕگەكانی ئەو ماددەیە،‌ هەر كەسێك سووكایەتی بە سەرۆك كۆماری توركیا بكات، لە ساڵێك بۆ چوار ساڵ سزای زیندانیكردنی بەسەردا دەسەپێندرێت؛ سزای ئەو كەسانەش پارێزبەندییان هەیە بە قەرەبووی دارایی دەبێت.