سەردێر

توركیا.. 55 كۆچبەر دەستگیركران

خەڵك
جەندرمەی توركیا، 55 كۆچبەرییان لە پارێزگای موغڵا لە ڕۆژئاوای ئەو وڵاتە دەستگیركرد و ڕەوانەی فەرمانگەی كۆچی پارێزگاكەیان كردن.
بەپێی ڕاگەیەنراوی پارێزگای موغڵا، هێزەكانی جەندرمەی توركیا 55 كۆچبەری نایاساییان لە پارێزگای موغڵا لە ڕۆژئاوای وڵاتەكە دەستگیركردووە، كە هەڵگری ڕەگەزنامەی سوریایی و عیراقی بوون و بەنیازبوون بەشێوەی نایاسایی ڕووبكەنە دەرەوەی توركیا.

لە ڕاگەیەنراوەكەدا ئاماژە بەوەشدراوە، دوای پێدانی زانیاریی لەلایەن هاووڵاتییانەوە، سەبارەت بە هەبوونی ژمارەیەك كۆچبەری نایاسایی و ڕێككەوتنیان لەگەڵ ژمارەیەك قاچاغچی بۆ ئەوەی لە ڕێگای دەریای ئیجەوە بچنە یۆنان، هێزەكانی جەندرمە ڕوویان كردە شوێنی مانەوەی كاتیی كۆچبەرەكان و دەستگیریان كردن.

ئەوەشخراوەتەڕوو، دوای تەواوكردنی ڕێكارە یاساییەكان لەبارەیانەوە، كۆچبەرە دەستگیركراوەكان بە مەبەستی دیپۆرتكردنەوەیان ڕەوانەی فەرمانگەی كۆچ لە پارێزگاكە كران.