سەردێر

ئەمریكا بۆ هاووڵاتیانی: بەپەلە ئەم وڵاتە جێبهێڵن

خەڵك-
حكومەتی ئەمریكا، داوا لە هاووڵاتیانی دەكات لە ئەفغانستان، بەپەلە و دەستبەجێ‌ وڵاتەكە جێبهیڵن، ئەمەش بەهۆی بەردەوامبوونی پێشڕەوییەكانی بزوتنەوەی تاڵیبان و كۆنترۆڵكردنی ناوچەی زیاتر لە ئەفغانستان.

باڵیۆزخانەی ئەمریكا لە كابول، داوای لە ئەمریكاییەكان كرد، دەستبەجێ‌ هەموو گەشتە فڕۆكەوانییە بەردەستەكان بەكاربهێنن بۆ جێهێشتنی وڵاتەكە، داواشی كردبوو ئەوەی پارەی پێویستی پێنییە بۆ كڕینی بلیت، دەستبەجێ‌ پەیوەندییان پێوە بكات، تا قەرزی تایبەتی پێبدەن و بگەڕێتەوە بۆ نیشتمان.

باڵیۆزخانەكە، داوای لەو ئەمریكاییانەش كردبوو كە ناتوانن دەستبەجێ‌ ئەفغانستان بەجێبهێڵن بەهۆی چاوەڕوانی وەرگرتنی ڤیزەی كۆچ بۆ هاوسەرەكانیان یان منداڵەكانیان، دەستبەجێ‌ پەیوەندییان پێوە بكەن.

باڵیۆزخانەی ویلایەتە یەككگرتووەكان لە ئەفغانستان، هۆشداریی دابوو لەوەی كە تواناكانی بۆ یارمەتیدانی ئەمریكاییەكان زۆر كەمبۆتەوە، تەنانەت لە كابولی پایتەختیش، بەهۆی ڕەوشی ئەمنی و بڕیاری پاشەكشەپێكردنی دیپلۆماسە ناسەرەكییەكان لەو وڵاتە.

ئەم بڕیارە دوای كۆنترۆڵكردنی سەنتەری ویلایەتەكان دێت لەلایەن بزوتنەوەی تاڵیبان و پێشڕەوی بەردەوامی بزوتنەوەكە لەنێو ئەفغانستان.