سەردێر

چین بڕیارێكی نوێ‌ لەبارەی وەچەخستنەوە دەردەكات

خەڵك-
دەسەڵاتدارانی چین ڕایدەگەیەنن، بەنیازن پشتیوانی لەو ژن و پیاوانە بكەن كە دەیانەوێت وەچەی سێیەم بخەنەوە.

مەكتەبی سیاسی كۆمیتەی ناوەندی حزبی كۆمۆنیستی چینی لە كۆبوونەوەی ئەمڕۆ دووشەممەدا ڕایگەیاند، جێبەجێكردنی ئەو سیاسەتە و ڕێكارەكانی پشتیوانیكردن، یاریدەدەردەبن بۆ باشكردنی هەرەمی دانیشتوان لە چین، و بەشێوەیەكی كاریگەر چارەسەری كێشەی پیربوونی دانیشتوان دەكەن و پارێزگاریش لە خەسەڵەتەكانی داهاتە مرۆییەكان دەكەن لە وڵات.

ئەمەش لەكاتێكدایە كە تائێستا وادەیەك بۆ دەستكردن بە جێبەجێكردنی ئەو ڕێكارە ڕانەگەیەندراوە.

بۆ دەیان ساڵە گەشەی دانیشتوان لە چین، خاوبوونەوەی بەخۆوەبینیوە، بەجۆرێك كۆی گشتی دانیشتوان گەیشتۆتە 1.411 ملیار كەس، ئەمەش بەپێی دوایین سەرژمێری دانیشتوان لە وڵاتەكە كە ئاماژەكردنە بە دەركەوتنی تەنگژەیەكی چاوەڕوانكراو بەهۆی بەرزبوونەوەی ڕێژەی بەساڵاچوان و پیربوونی كۆمەڵگە.

ژمارەی دانیشتوانی چین 72 ملیۆن كەس زیادی كردووە، بەڵام گەشەی دانیشتوان كە دەگاتە 5.4% لەماوەی دە ساڵی ڕابردوو، خاوترین بووە لە شەستەكانی سەدی ڕابردوو.