سەردێر

میلیشیا ئیسلامییەكانی تەرابلوس لە شەڕدان

خەڵك-

لە تەرابلوسی پایتەختی لیبیا ماوەی دوو رۆژە شەڕ لەنێوان میلیشیا ئیسلامییە چەكدارەكانی ئەم وڵاتەدا سەریهەڵداوە كە فائیز سەراج سەرۆكی پێشووی حكومەت دامەزرێنەریان بووە .

سەرچاوە سەربازییە لیبیاییەكان بۆ كەناڵی سكای نیوز ئاشكرایان كرد شەڕی نێوان میلیشیا چەكدارەكانی تەرابلوس لەنێوخۆیاندا كوژراوی لێكەوتووەتەوە.

سەرچاوەكان دەڵێن میلیشیاكانی دەزگای پارێزگاری سەقامگیری بە فەرمانی فەرماندارەكەیان هەستاون بە رفاندنی 7 چەكداری ئیدارەی ئۆپەراسیۆنەكانی ئاسایشی دادوەری دوای ئەوەی پاسەوانێكی فەرماندەی هێزەكەی یەكەم دەستگیركراوە.

رۆژی هەینی كۆبوونەوەیەك لەنێوان فەرمانداری میلیشیا چەكدارە توندڕۆكانی تەرابلوس كراوە رێككەتوون لەسەر هەڵوەشاندنەوەی میلیشیاكانی سەر بە عەبدول غەنی ككلی.

میلیشیاكانی ككلی بە فەرمانی فائیز سەڕاج سەرۆك وەزیرانی پێشوو پێكهاتوون و بودجەیان بۆ دابین دەكرا، ئەم میلیشیایانە بەشداریان كردووە لە كوشتنی كەسانی سڤیل و سەربازی و لە شەڕیشدا بوون لە دژی سوپای نیشتمانی لیبیا بە فەرمانداری خەلیفە حەفتەر.