سەردێر

مەترسی رادەستكردنەوەی سەركردەكانی ئیخوان لەلایەن توركیاوە هەیە

ناكۆكی لەنێوان گرووپی ئیخوان و ئۆپۆزسیۆنی میسری سەریهەڵداوە

خەڵك-

لە چەند رۆژی رابردوودا شەڕ و ناكۆكی لەنێوان گرووپی ئیخوان و هاوپەیمانەكانی كە بە ئۆپۆزسیۆنی میسری لە دەرەوە ناسراون بە تایبەت لە توركیا سەریهەڵداوە لەسەر هەندێك بابەت.

بەپێی راپۆرتی كەناڵی سكای نیوز، ناكۆكی لە نێوان ئیخوان و هاوپەیمانەكانی چەند ساڵێكە هەبووە، بەڵام لە مانگەكانی رابردوودا پەرەیسەندووە بەهۆی كۆمەڵێك هۆكار، یەكێكیان هەوڵی ئیخوانە بۆ گفتووگۆ لەگەڵ میسر، بۆ فشاركردن لەسەر ئەنقەرە لە دانانیان لە چوارچێوەی پلانی گفتوگۆكانی ئایندەی لەگەڵ میسر، ئەمەش لە چوارچێوەی دەركەوتنی رێبەری گشتی ئیخوان لە یەكێك لە كەناڵەكان كە تێیدا هاوپەیمانەكانی پشتگوێخست كە لە 2014وە لە سەر خاكی توركیان.

كێشەیەكی دیكە بریتییە لە دۆسێی ژمارەیەكی زۆر گەنجی نیشتەجێی توركیا بەبێ بەڵگەنامەی فەڕمی كە كۆمەڵێكی زۆریان بەڵێنیان پێدرابوو لەلایەن ئیخوانەوە بەڵگەنامەی فەڕمی نیشتەجێبوونی توركیایان بۆ بكات یان مامەڵەی دەرچوونیان لە توركیا بۆ بكات بۆ وڵاتانی دیكە، بەڵام ئیخوان چی دیكە پشتگیریی ئەو گەنجانە ناكات كە ژمارەیان دوو هەزار كەسە، ئەم گەنجانەش نیگەرانن بەتایبەت لەگەڵ نزیكبوونەوەی میسر و توركیا و مەترسی گەڕاندنەوەیان هەیە.

لەلایەكی دیكەوە گرووپی ئیخوان پارەیەكی زۆری تەرخان كردووە بۆ هاوپەیمانەكانی بۆ دژایەتیكردنی حكومەتی میسر، بەڵام لە ئەو هەوڵەیدا شكستی هێناوە.

لە دوای رووخانی دەسەڵاتی ئیخوان لە میسر لە 2013 دوای تەنها ساڵێك لە حكومڕانی، گروپی ئیخوان چەندین هاوپەیمانی كردووە، بەڵام لە ماوەی 7 ساڵی رابردوودا شكستی هێناوە لە ئەم هاوپەیمانێتیانەدا هیچی دەست نەكەوتووە، بگرە قەیرانیشی بۆ زیادكردووە.

لەگەڵ نزیكبوونەوەكانی توركیا و میسر گرووپی ئیخوان كەوتووەتە بارێكی قەیراناوییەوە، مەترسی هەیە سەركردەكانی لە توركیا رادەستی میسر بكرێنەوە كە لە دادگای میسر داواكراون.