سەردێر

شاندێكی توركیا سەردانی میسر دەكات

ئامادەكاری بۆ كۆبوونەوەی ئۆغلۆ و شوكری دەكرێـت

خەڵك-

ئەمڕۆ پێنج شەممە مەولود چاوش ئۆغلۆ وەزیری دەرەوەی توركیا ئاشكرایكرد شاندێكی دپلۆماسی توركیا لە مانگی ئایاردا بەرەو میسر بەڕێدەكەوێت لە هەنگاوێكی دیكەی نزیكبوونەوەی نێوان ئەنقەرە و قاهیرەدا.

چاوش ئۆغلۆ بە ئاژانسەكانی توركیای راگەیاند لە دوای سەردانی شاندەكەی توركیا بۆ میسر، لەگەڵ سامح شوكری وەزیری دەرەوەی میسردا كۆدەبێتەوە.

دوێنێ چوار شەممە مەولود چاوش ئۆغلۆ وەزیری دەرەوەی توركیا ئاشكرایكرد قۆناغێكی نوێ لە پێوەندی توركیا و میسر دەستیپێكرد لەگەڵ دەستكردن بە ئاڵوگۆڕی سەردان و گفتووگۆ.

ئاماژەی بە ئەوەشكرد بە ئەم نزیكانە كۆبوونەوەی یاریدەدەرانی وەزیرانی دەرەوەی میسر و توركیا دەكرێت، كار دەكرێت بۆ دیاریكردنی وادەی كۆبوونەوەكە.

بە بۆنەی مانگی رەمەزانەوە وەزیری دەرەوەی توركیا پەیوەندی بە سامح شوكری وەزیری دەرەوەی میسرەوە كرد بە ئەم بۆنەیەوە پیرۆزبایی لێكرد.

بە رای چاودێران ئەم هەنگاوەی ئەنقەرە هەوڵێكی نوێیە بۆ نزیكبوونەوە لە میسر.

لە ئەم دواییەدا توركیا دەستیكرد بە نزیكبوونەوە لە میسر لە بەرامبەردا چالاكییە سیاسی و میدیایی و رێكخراوەییەكانی گرووپی ئیخوان موسلیمینی لە توركیا راگرت.