سەردێر

بەمزووانە كۆبوونەوەی توركیا و میسر دەكرێـت

ئۆغلۆ: پێوەندییەكانی میسر و توركیا چووە قۆناغێكی نوێوە

خەڵك-

وەزیری دەرەوەی توركیا مەولود چاوش ئۆغلۆ ئەمڕۆ چوار شەممە رایگەیاند پێوەندییەكانی نێوان توركیا و میسر چوونە قۆناغێكی نوێ لە پێوەندی بە هەوڵەكانی نزیكبوونەوەی هەردوو دەوڵەت لە دوای قەدەغەكردنی چالاكییەكانی گرووپی ئیخوان موسلیمین لەلایەن فەرمانڕەوایانی توركیاوە لەسەر خواستی میسر بۆ ئاساییكردنەوەی پێوەندییەكانیان.

مەولود چاوش ئۆغلۆ لە لێدوانێكدا رایگەیاند قۆناغێكی نوێ لە پەیوەندییەكانی میسر و توركیا دەستیپێكرد، لە ئەم چوارچێوەیەدا سەردان و گفتووگۆ دەبێت.

ئاماژەی بە ئەوەش كرد بەم زووانە كۆبوونەوەی نێوان توركیا و میسر لەسەر وەزیرانی دەرەوە دەكرێت، ئێستا كار دەكرێت بۆ دیاریكردنی وادەی كۆبوونەوەكە.

وەزیری دەرەوەی توركیا بە بۆنەی هاتنی مانگی رەمەزانەوە قسەی لەگەڵ سامح شوكری وەزیری دەرەوەی میسردا كردووە، پیرۆزبایی ئەو مانگەی لێكردووە.

لە ئەم دواییەدا ئەنقەرە خواستی خۆی بۆ ئاساییكردنەوەی پێوەندی لەگەڵ قاهیرە نیشاندا، بۆیە چالاكییەكانی گرووپی ئیخوانی لە توركیا راگرت، پەخشی بەرنامە سیاسییەكانی كەناڵەكانی سەر بە ئیخوانی لە ئیستەنبوڵ راگرت، قاهیرە پێشوازی لە ئەم هەنگاوە كردارییانەی ئەنقەرە كرد.

ماوەی 8 ساڵە پێوەندیی نێوان توركیا و میسر نەبووە بەهۆی پشتیوانیكردنی ئەنقەرە لە گرووپی ئیخوان موسلیمین دوای ئەوەی لەلایەن عەبدولفەتاح سیسی سەرۆكی ئێستای میسرەوە كودێتا بەسەر دەسەڵاتی ئیخوانیدا كرا لە 2013 .

سیسی توندترین هەڵمەتی دژی گرووپی ئیخوان لەمێژووی میسردا دەستپێكرد، زۆرینەی سەركردەكانی خستنە زیندانەوە و هەموو كارێكی سیاسی و میدیایی و جەماوەری و رێكخراوەیی قەدەغەكرد و گرووپەكەی خستە لیستی تیرۆرەوە.