سەردێر

6 ملیۆن منداڵ لەجەنگدا لە دایكبوون

خەڵك-

نزیكەی 6 ملیۆن منداڵ لە ماوەی جەنگی بەردەوامی سوریادا لە 10 ساڵی رابردوودا لە دایكبوون، نەوەیەك كە هیچ ژیانێكی خۆشیان نەدیوە جگە لە شەڕ و توندوتیژی.

رۆژنامەی لۆمۆندی فەڕەنسی لە زاری رێكخراوی منداڵانی نەتەوە یەكگرتووەكان یۆنیسێف ئاماژەی بەوەكردووە، منداڵەكان لە ریزی زیان بەركەوتووەكانن، ئەوان لە هێڵەكانی پێشەوەن، بەتایبەت منداڵی ئاوارەكان دەناڵێنن بە دەست نەبوونی سەقامگیرییەوە، ئەوان دایك یان باوك یان هەردووكیان مردوون، لە ژینگەیەكی ئابووری گرژ و ئاڵۆزدا دەژین.

ئەو راپۆرتەی رێكخراوی یۆنیسێفی سەر بە نەتەوە یەكگرتووەكان، لەبارەی پێشێلكاری مافەكانی منداڵانی سوریاوە رایدەگەیەنێت منداڵی ئاوارەكان لە ئەوپەڕی رەوشێكی خراپدا دەژین، بە دوای كاردا دەگەڕێن زۆر جار كرێیەكی زۆر كەم وەردەگرن تەنها بۆ ئەوەی لە ژیاندا بمێننەوە یان هاوكاری خێزانەكانیان بكەن.

راشیگەیاندووە سەدان هەزار منداڵ لە خوێندن بێ بەشن لەكاتێكدا پێش جەنگ منداڵانی سوریا باشترین خوێندنیان هەبوو لەنێو وڵاتانی عەرەبیدا.

رەوشی ئاوارەكان لە خێوەتگەكانی باكوری خۆرهەڵاتی سوریا زۆر خراپە بەتایبەت ئەوانەی لەژێر دەستی هێزە كوردییەكاندان كە ژمارەی دانیشتوانی خێوەتگەی هۆڵ 65 هەزار كەسە، 94%یان ژن و منداڵانن، نیوە زۆرتری منداڵەكان تەمەنیان لە خوار دوازدە ساڵەوەیە، 48% عێراقی، 37% سوریایی، 15% لە 57 رەگەزی دیكەن.