سەردێر

80%ی سوریاییەكان هەژارن

ئەسەد دەست بە دەرهێنانی پارەی گیرفانی سوریاییەكان دەكات

خەڵك-

لە ژێر قەیرانی دارایی خنكێنەر و پاشەكشەی دراوە بیانییە قورسەكان لە خەزێنەی گشتیدا، حكومەتی سوریا دەیهەوێت ئەو كەموكوڕییە بە نەختینەی یەدەگی گیرفانی سوریاییەكانی دەرەوە پڕبكاتەوە، سەرەتاش بە سەپاندنی بڕەپارەیەك بەسەر پاسپۆرتی ئەو كەسانەدا.

لای خۆیەوە بەڕێوەبەری تۆماری سەربازی سوپای رژێمی سوریا فەرمانیكردووە بە دەستبەسەرداگرتنی پارە و موڵكی ئەو كەسانەی تا تەمەنی 42 ساڵی ئامادەی خزمەتی سەربازی نابن، بەڵام لە كاتی پێدانی 8 هەزار دۆلار هیچ لێپرسینەوەیەكی یاساییان لەگەڵدا ناكرێت.

هاوكات رێژەی زیاد لە 80%ی سوریاییەكان لە ژێر هێڵی هەژارییەوەن، بەپێی راپۆرتی نەتەوە یەكگرتووەكان، لەگەڵ بەرزبوونەوەی نرخی كەرەستەی خۆراكی بە رێژەی 30% لە ئایاری 2019وە بەپێی بەرنامەی خۆراكی جیهانی.

لە پێش ئەم قەیرانانەدا حكومەتی سوریا هەوڵ دەدات چارەسەری كێشەكانی بكات لە رێگای گیرفانی سوریاییەكانەوە كە خۆیان ئەو خەڵكە دەناڵێنن بە دەست بەرزی نرخ و هەڵاوسانی گەورەوە، تەنانەت بە وەستانیان لە ریزی درێژی نان و غاز و بەنزین.

بەشار ئەسەد هیچ دەروازەیەكی نەدۆزیەوە بۆ گەیشتن بە پارەی خەڵكەكەی، تەنها لە رێگای هەمواری یاسای خزمەتی سەربازییەوە نەبێت، ئەمەش دوای توندكردنی فشارەكان لەسەری بە تایبەت دوای دەرچوونی یاسای قەیسەر و پشتیوانی ئەمریكا لە سەپاندنی سزای نوێ بەسەر دیمەشقدا.