سەردێر

برسێتی هەڕەشە لە نیوەی منداڵانی یەمەن دەكات

1 ملیۆن و 200 هەزار ژنی دووگیان و شیردەر دەناڵێنن بەدەست كەمی خواردنەوە

خەڵك-

ئاژانسەكانی سەر بە نەتەوە یەكگرتووەكان هۆشداری دەدەن لەوەی نیوەی منداڵانی یەمەن دەناڵێنن بە دەست برسێتی و خراپی خواردنەوە، سەدانیان لێ دەمرێت بەهۆی كەمی هاوكارییە مرۆییەكانەوە.

بەهۆی ململانێی یەمەنەوە گەورەترین قەیرانی مرۆیی لە جیهاندا سەریهەڵداوە بەپێی نەتەوە یەكگرتووەكان لەگەڵ دەیان هەزار كوژراو، ملیۆنان ئاوارە و برسێتی.

رێكخراوی خۆراك و كشتوكاڵی سەر بە نەتەوە یەكگرتووەكان و رێكخراوی منداڵانی سەر بە نەتەوە یەكگرتووەكان یونسێف و بەرنامەی خۆراكی جیهانی و رێكخراوی تەندروستی جیهانی هۆشداری دەدەن لە برسێتی مەترسیدار كە هەڕەشە لە نیوەی منداڵانی خوار تەمەن 5 ساڵی یەمەن دەكات لە ساڵی 2021، كە نزیكەی 2 ملیۆن و 300 هەزار منداڵ دەگرێتەوە.

ئەو رێكخراوانە لە راگەیەنراوێكدا ئاشكرایان كرد پێشبینی دەكرێـ 400 هەزار منداڵ رووبەڕووی خراپی خواردن و برسێتی ببنەوە و هەڕەشەی مردنیان لەسەرە و پێویستیان بە چارەسەری بە پەلە هەیە، ئەم ژمارەیە بە رێژەی 22% زیادیكردووە بەراورد بە ساڵی رابردووی 2020.

بەڕێوەبەری گشتی رێكخراوی یونسیف هنرییتا فور دەڵێت: هەموو رۆژێك بەبێ جووڵە منداڵی زیاتر دەمرن، رێكخراوە مرۆییەكان پێویستیان بە داهات هەیە بۆ گەیاندنی هاوكاری بە خەڵك.

وتیشی: هاوكات 1 ملیۆن و 200 هەزار ژنی دووگیان و شیردەر دەناڵێنن بەدەست كەمی خواردنەوە.