سەردێر

زیانی هێرشی ئیسرائیل بۆ سوریا

خەڵك- بەشی هەواڵ

كەناڵی العالم-ی ئێرانی لەزاری سەرچاوەیەكەوە ئاشكرایكرد كە هێرشی ئاسمانی فڕۆكە جەنگییەكانی ئیسرائیل بۆ سەر پارێزگای حەما لەنێوەڕاستی سوریا لە بەیانی ئەمڕۆ هەینی، كوژراو و برینداری لێكەوتووەتەوە.

بەپێی هەواڵی كەناڵەكە، خێزانێكی 4 كەسی لە ئەنجامی هێرشی فڕۆكە ئیسرائیلییەكان بۆ سەر پارێزگای حەما كوژراون و 4ی دیكەش بریندار بوون و 3 ماڵیش وێران بوون.

ئەمڕۆ ئاژانسی هەواڵی سانای فەڕمی سوریا بڵاویكردەوە هێزە دژە ئاسمانییەكانی سوریا بەرپەرچی هێرشی ئاسمانی ئیسرائیلیان بۆ سەر خاكی سوریا داوەتەوە.

بەپێی سەرچاوەكانی هەواڵ، بەیانی ئەمڕۆ فڕۆكە ئیسرائیلییەكان چەند بنكەیەكی سەربازی سەر بە حكومەتی سوریا و ئێرانیان لە حەماو دیمەشق و تەرتووس بۆردومانكردووە.

سوپای ئیسرائیل لە هەفتەی رابردوو بەهێزترین هێرشیكردە سەر بنكەی سەربازی ئێران و هاوپەیمانەكانی لە سنوری عێراق و سوریا لە پارێزگای دێرزوور لەوێ 40 چەكدار و سەرباز كوژران بەپێی راگەیەنراوی روانگەی سوریایی بۆ مافەكانی مرۆڤ.

سوپای ئیسرائیل ژمارەی هێرشەكانی زیادكردووە بە جۆرێك لە ماوەی 10 رۆژدا 3 هێرش ئەنجام دەدرێت، كە پێشتر لە 4 هەفتەدا تەنها هێرشێك دەكرا.