سەردێر

ئیسرائیل سوریای بۆردومان كرد

خەڵك- بەشی هەواڵ

ئاژانسی رۆیتەرز بڵاویكردەوە شەوی رابردوو بۆردومان لە پارێزگاری حەما لە نێوەڕاستی سوریا كراوە.

ئاژانسی هەواڵی سانای سوریایی بڵاویكردەوە هێزە دژە ئاسمانییەكانی سوریا بەرپەرچی بۆردومان و هێرشی ئاسمانی ئیسرائیلیان لە پارێزگای حەما داوەتەوە بەبێ بڵاوكردنەوەی زانیاری زیاتر.

پێش دوو هەفتە بنكە ئێرانییەكان لە خۆرهەڵاتی سوریا كرانە ئامانجی هێرشە ئاسمانییەكانی ئیسرائیل لە چوارەم هێرشدا لە ماوەی تەنها 2 هەفتەدا.

رۆژنامەی هائارتزی ئیسرائیلی بڵاویكردەوە ئەو هێرشانەی ئیسرائیل لە وەڵامی جموجۆڵەكانی تاران بووە لە نزیك سنوورەكانی سوریا و عێراق كە لە ئەنجامی ئەو هێرشانەدا دەیان لایەنگری ئێران كوژران و بریندار بوون.

چەند مانگێكە ئیسرائیل هێرشەكانی بۆ سەر پێگە سەربازییەكانی ئێران و هاوپەیمانەكانی لە ژمارەیەك ناوچەی سوریا چڕكردووەتەوە.

هاوكات رۆژنامە ئیسرائیلییەكە ئاشكراشیكردووە كاربەدەستانی ئیسرائیلی نیگەرانی ئەوەن بەڕێوەبەرایەتی نوێی ئەمریكا بە رێبەرایەتی جۆ بایدن پشت لە عێراق بكەن، هاوكات ترسیشیان هەیە لە گەڕانەوەی ئەمریكا بۆ رێككەوتنی ناوەكی و سوككردنی گەمارۆكانی سەر تاران.