سەردێر

كۆمسیۆن ڕۆڵی چاودێری نێودەوڵەتی و نێوخۆیییەكان ڕووندەكاتەوە

خەڵك

كۆمسیۆنی باڵای سەربەخۆی هەڵبژاردنەكان جەختدەكاتەوە، كە ڕۆڵی چاودێران لەپڕۆسەی هەڵبژاردندا تەنها كاری چاودێری دەبێت و جگە لە پاڵێوراو پارتە سیاسییەكەی، هیچ كەس و لایەنێك بۆی نییە لەسەر ئەنجامەكانی دەنگدان سكاڵا پێشكەشی كۆمسیۆن بكات.

جومانە غەلای وتەبێژی كۆمسیۆنی باڵای سەربەخۆی هەڵبژاردنەكان بە ماڵپەڕی فەرمی یەكێتی ڕایگەیاندووە: ئەوەی تایبەتە بەڕۆڵی چاودێرە نێودەوڵەتی و نێوخۆییەكان و بریكاری پارتە سیاسییەكان، بەگوێرەی یەكێك لە ماددەكانی یاسای كۆمسیۆن بە ژمارە 31ی ساڵی 2019 كە دەڵێت: لەسەر كۆمسیۆنی هەڵبژاردنەكانە كە پشت بەچاودێری نێودەوڵەتی شرۆڤەكار و بریكاری پارتە سیاسییەكان ببەستێت تەنها بۆ چاودێری پڕۆسەی هەڵبژاردن.

غەلای ڕاشیگەیاند: مەبەست و ئەركی چاودێر ئەوەیە لایەنە ئەرێنی و نەرێنییەكان لە پڕۆسەی هەڵبژاردن دەستنیشان بكات و پاشان بەڕاپۆرتێك بەرزیدەكاتەوە بۆ ئەو لایەنەی كە ئەندامە تێیداو بۆشی نییە سكاڵا پێشكەش بكات، بەڵام ئەگەر مەبەست ئەوە بێت چاودێر بۆی هەبێت دەستوەرداتە ناو پڕۆسەكە، ئەوە بۆ هیچ كەس و لایەنێك نییە دەستوەرداتە پڕۆسەكە، پرسی هەڵبژاردن، پرسێكی تەواو عیراقییە.

وتەبێژی كۆمسیۆنی باڵای سەربەخۆی هەڵبژاردنەكان دووپاتیشی كردەوە، كۆمسیۆنی هەڵبژاردنەكان دامەزراوەیەكی عیراقی سەربەخۆ و بێلایەن و پیشەییە و ئەنجومەنی نوێنەران سەرپەرشتی كارەكانی دەكات، ئاماژەشیدا كە تەنها دەنگدەر و پارتە سیاسییەكان بۆیان هەیە سكاڵا پێشكەشی كۆمسیۆنی باڵای سەربەخۆی هەڵبژادنەكان بكەن، ئەوەش لەناوەندی ئەو دەنگدانەدا دەبێت كە دەنگی تێدا داوە، یاخود بەچاودێر ناوی تۆماركردووە.

لەبارەی راگەیاندنی ئەنجامەكانی هەڵبژاردنەوە، غەلای جەختیكردەوە كە ڕاگەیاندنی ئەنجامەكان تەنها لەڕێگەی كۆمسیۆنەوە دەبێت، ئاماژەشیدا ڕاگەیاندنی ئەنجامەكان لەدوای 24 كاتژمێر لەكۆتاییهاتنی پڕۆسەكە دەبێت، جەختیشی كردەوە كە كۆمسیۆن ئامادەكاری دەكات بۆ ئەنجامدانی تاقیكردنەوە لەسەر ئاشكراكردنی ئەنجامەكان، بۆئەوەش 3 تاقیكردنەوە ئەنجام دەدات، تاقیكردنەوەی یەكەمیان لەسەر ئامێری ئەلكترۆنی دەنگدان دەبێت، دووەمیشیان ژماردن و جیاكردنەوەی دەنگەكان بەڕێگەی ئەلكترۆنی و پاشان بەدەستی، تاقیكردنەوەی یەكەم لەمانگی تەمووزدا دەبێت و هەردوو پڕۆسەی دەنگدانی گشتی و تایبەتی لەسەر تاقیدەكرێتەوە، ئەوەش بۆ دڵنیابوونە لە خێرایی و وردی ئامێرەكان.