سەردێر

عیراق، لە دوای ڕۆژووشكاندن هاتووچۆ قەدەغە دەكرێت

خەڵك-
شانەی قەیرانی پەرلەمانی عیراق، وردەكاریی نوێ‌ لە بارەی كاتژمێرەكانی قەدەغەی هاتووچۆ لە مانگی ڕەمەزاندا ئاشكرا دەكات و داواش لە هێزە ئەمنییەكان دەكات، ڕێكارەكانی سەلامەتی و تەندروستی و پابەندبوون بە بەستنی كەمامە توندبكەن.

جەواد موسەوی، بڕیاردەری لیژنەكە بە ئاژانسی فەرمی (العراقیە)ی ڕاگەیاند”ڕێكارەكانی سەپاندنی قەدەغەی هاتووچۆ لە مانگی ڕەمەزاندا وەك خۆی دەبێت، ڕۆژانی هەینی و شەممەش قەدەغەی هاتووچۆی گشتی دەبێت، قەدەغەی هاتووچۆی نیمچە گشتی لە دوای ڕۆژووشكاندنەوە ڕاستەوخۆ دەستپێدەكات”.

موسەوی، جەختی لەسەر پێویستی پابەندبوونی هاووڵاتیان كردەوە بە ڕێكارە تەندروستییەكان و دووركەوتنەوەی كۆمەڵایەتی لە سایەی زیادبوونی ڕێژەی تووشبوون بە ڤایرۆسی كۆرۆنا.

بڕیاردەری لیژنەی شانەی قەیرانی پەرلەمانی عیراق، داوای لە هێزە ئەمنییەكان كرد، ڕێوشوێنەكانی سەلامەتی و تەندروستی و پابەندبوون بە بەستنی كەمامە توندتر بكەن كە بە وتەی ئەو”پابەندنەبوونێكی زۆر هەیە بە ڕێكارە تەندروستییەكان، بە تایبەتیش لەم ماوەیەی دوایی”.

دوێنێ‌ سێ‌ شەممە، وەزارەتی تەندروستی عیراق، تۆماركردنی 7300 حاڵەتی تووشبوونی نوێی بە ڤایرۆسی كۆرۆنا و 33 حاڵەتی گیانلەدەستدانی بەهۆی پەتاكەوە، ڕاگەیاند.