سەردێر

سەدر داواكارییەكی هەیە

خەڵك

دوای پەسندكردنی پڕۆژەیاسای بودجە لە ئەنجومەنی نوێنەرانی عیراق، ڕێبەری ڕەوتی سەدر بە تەلەفۆن قسەی لەگەڵ سەرۆكی ئەنجومەنی نوێنەران و جێگرەكەی و سەرۆكی هاوپەیمانیی سائیرون كرد و داوایكرد چاودێریی جێبەجێكردنی بڕگەكانی بودجە بكەن.

نووسینگەی ڕاگەیاندنی ڕێبەری ڕەوتی سەدر لە ڕاگەیەنراوێكدا ڕایگەیاند:”دوای پەسندكردنی بودجە، موقتەدا سەدر، ڕێبەری ڕەوتی سەدر بە تەلەفۆن پەیوەندیی بە محەمەد حەلبوسی، سەرۆكی ئەنجومەنی نوێنەرا، حەسەن كەعبی جێگری سەرۆكی ئەنجومەنی نوێنەران و نەبیل تەڕفی، سەرۆكی هاوپەیمانیی سائیرون كردووە و ڕۆڵی ئەوانی لە پەسندكردنی بودجەی فیدراڵی بەرز نرخاندووە”.

ئاماژە بەوەشدراوە، سەدر ئاگاداری كردوونەتەوە كە چاودێریی جێبەجێكردنی بڕگەكانی بودجە بكەن و لەدەست گەندەڵكاران دووری بخەنەوە.

ڕۆژی چوارشمەمە 31-03-2021 لەبارەی پەسندكردنی بودجە سەدر لە جریوەیەكدا لە تۆڕی كۆمەڵایەتی تویتەر نووسیویەتی:”دوای پەسندكردنی بودجە لەنێو هۆڵی ئەنجومەنی نوێنەران، دەخوازین ئەو بودجەیە لە دەستی گەندەڵكاران دووربێت و جددییەت هەبێت لە جێبەجێكردنی بڕگەكانی، بەتایبەتی پڕۆژە خزمەتگوزارییەكان، وەستاوەكان و ئەوانی تریش، بە پێچەوانەوە جارێكی تر گەل تووشی بێئومێدی دەبێت، ئیدی ئاگادارم كردنەوە”.

جێی ئاماژەیە، ڕۆژی چوارشەممە 31ی ئازاری 2021 ئەنجومەنی نوێنەرانی عیراق كۆبووەوە و بەگشتی دەنگی لەسەر ماددەكانی پڕۆژە یاسای بودجەی 2021ی عیراق دا، یەكێك لەو ماددانەش كە لە ماوەی ڕابردوودا كێشەی لەسەربوو، ماددەی 11 بوو لە پڕۆژەیاسای بودجە، كە تایبەتە بە بەشە بودجەی هەرێمی كوردستان و لە كۆبوونەوەكەی ئەنجومەندا بە كۆی دەنگ پەسندكرا.