سەردێر

كۆمسیۆن: هەڵبژاردن لە وادەی خۆیدا دەكرێت

خەڵك-
كۆمسیۆنی باڵای هەڵبژاردن لە عهیراق، نمونەی كارتی دەنگدان دادوەنێت و تەئكید لەسەر ئەنجامدانی هەڵبژاردن دەكاتەوە لە مانگی تشرینی یەكەمی داهاتوو.

جومانە ئەلغلای، وتەبێژی فەرمی كۆمسیۆن بە ئاژانسی فەرمی (العراقیە)ی ڕاگەیاندووە”كۆمسیۆن كات و خشتەی داناوە بۆ خۆئامادەكردن بۆ ئەنجامدانی هەڵبژاردن لە لە وادەی دیاریی كراوی خۆی كە 10ی تشرینی یەكەمی 2021یە”.

بە وتەی جومانە ئەلغلای”كۆمسیۆن لە مانگی كانوونی دووەمی ڕابردووەوە دەستیكردووە بە نوێكردنەوەی تۆماری دەنگدەران و دابەشكردنی كارتی بایۆمیتری، وێڕای پێشوازیی لە داواكارییەكانی تۆماركردنی هاوپەیمانییە سیاسییەكان و لیستی كاندیدەكان”.

وتەبێژی كۆمسیۆنی هەڵبژاردن دەڵێت”نمونەی كارتی دەنگدانیان داناوە لەگەڵ ڕەزامەندی كۆمپانیای پشكنەر، لەئێستاشدا لەگەڵ كۆمپانیای میرۆی كۆری هەماهەنگییان هەیە بۆ مەشقپێكردنی كادرەكانیان لەسەر ئامێرە ئەلیكترۆنییەكانی تایبەت بە هەڵبژاردن”.

ئەلغلای پێیوایە”ڕێژەی بەشداریی لە هەڵبژاردن پشت بە هۆشیاری دەنگدەر و هاوبەشەكان لە پرۆسەكەدا و گرنگی هەڵبژاردن و ڕۆڵی كاریگەریی لە هێنانەدی ئاسایش و سەقامگیریی لە وڵاتدا دەبەستێت”.