سەردێر

پاپا عێراقی بەجێهێشت

خەڵك-

كەمێك لەمەوبەر پاپا فڕانسیس پاپای ڤاتیكان لە رێگای فڕۆكەخانەی نێودەوڵەتی بەغداوە عێراقی بەجێهێشت بەرە و ڤاتیكان.

لە رێوڕەسمێكدا بەرهەم ساڵح سەرۆك كۆماری عێراق و ژمارەیەك لە بەرپرسانی دیكەی عێراق لە فڕۆكەخانەی نێودەوڵەتی بەغدا خواحافیزییان لە پاپا كرد.

ئەمڕۆ دوو شەممە دوای 3 رۆژ مانەوەی لە عێراق و هەرێمی كوردستان پاپا فڕانسیس پاپای ڤاتیكان كۆتایی بە سەردانە مێژووییەكەی دەهێنێت.

پاپا فڕانسیس لە كۆتا چالاكییەكانی سەردانە مێژووییەكەی دا بۆ عێراق داوای ئاشتی و هاوكاری پێكهاتەكانی كرد بۆ بەرژەوەندی گشتی .

پاپا راشیگەیاند لە عێراقەوە دەگەڕێتەوە بۆ رۆما، بەڵام عێراق بە هەمیشەیی لەگەڵیدا و لەدڵیدا دەمێنێتەوە.

ئەتیۆ برۆنی وتەبێژی ڤاتیكان رایگەیاند ئەم گەشتەی پاپا رەوشێكی تایبەتی هەیە لەچوارچێوەی رەوشی ئەمنی و تەندروستی عێراقدا، بەڵام دەستپێشخەری خۆشی و ئاشتی بۆ ئەو زەوییە و گەلەیە.

پاپای ڤاتیكان پاشنیوەڕۆی رۆژی هەینی بەسەردانێكی مێژوویی گەیشتە بەغدا، لە وێ لەگەڵ سەرۆك كۆمار و بەرپرسانی باڵای عێراقدا كۆبووەوە.

دووهەم رۆژی سەردانەكەی پاپا بریتی بوو لەسەردانكردنی شاری نەجەف و كۆبوونەوە لەگەڵ رێبەری شیعەكانی عێراق عەلی سیستانی.

هەمان رۆژ پاپا سەردانی پارێزگای زیقاری كرد لەوێ لە شاری ناسریە شاری مێژوویی ئووری بەسەر كردەوە.

لە سێهەم رۆژی سەردانەكەیدا پاپا بەیانی دوێنێ گەیشتە هەولێر لەوێ لە فڕۆكەخانە لەگەڵ گەورە بەرپرسانی هەرێمی كوردستاندا كۆبووەوە.

دواتر پاپا سەردانی شاری موسڵ و چەند شوێنێكی دیكەی پارێزگای نەینەوای كرد لەوێ لەگەڵ مەسیحییەكانی نەینەوادا كۆبووەوە.

پاشنیوەڕۆش گەڕایەوە شاری هەولێر لەوێ لە یاریگای فڕانسۆ هەریری بەشداری رێوڕەسمێكی كرد بە بەشداری دەیان هەزار كەس و بەرپرسانی باڵای هەرێم.

سەردانەكەی پاپا بریتی بوو لە گەیاندنی پەیامی ئاشتی و برایەتی، بەسەركردنەوەی مەسیحییەكانی عێراق دوای ئەو نەهامەتییانەی بەسەریاندا هات.