سەردێر

پێنج ساڵ زیندانی بەسەر پارێزگاری نەینەوادا سەپێنرا

خەڵك-
دادگای ناوەندی تاوانەكانی تایبەت بە بنبڕكردنی گەندەڵی لە سەرۆكایەتی دادگای تێهەڵچوونەوە لە بەغدا، دوو حوكمی بەسەر نەوفل حەمادی سوڵتان پارێزگاری پێشووی نەینەوادا سەپاند، ئەمەش بەهۆی تاوانی تایبەت بە پرۆژەی خەیاڵی لە پارێزگەكە.

ناوەندی ڕاگەیاندن لە ئەنجومەنی باڵای دادوەری لە بەیاننامەیەكدا ڕایگەیاند”دادگای تاوانەكانی تایبەت بە بنبڕكردنی گەندەڵی، تەماشای دوو سكاڵای لەسەر نەوقل حەمادی سوڵتان پارێزگاری پێشووی نەینەوا كردووە و دوو حوكمی لەدژ دەركردووە، یەكەمییان سزای سێ‌ ساڵ زیندانیى توند و دووەمیش سزای دوو ساڵ زیندانی توندە، لەگەڵ پێدانی ماف بە پارێزگەی نەینەوا بە داواكردنی قەرەبووكردنەوە بەپێی ئەحكامەكانی ماددەی 340ی یاسای سزادانی عیراقی”.

هەر لە بەیاننامەكدا هاتووە”تۆمەتبار تاوانباركراوە لە پرۆژە خەیاڵییەكانی تایبەت بە پاككردنەوە و نۆژەنكردنەوەی باڵەخانەكان لە پارێزگەی نەینەوا لە ماوەی ساڵانی 2017 بۆ 2019″.