سەردێر

خەڵك هۆكاریی سەرهەڵدانەوەی داعش ئاشكرا دەكات

خەڵك-
هاوپەیمانی سائیرون كە سیاسەتەكانی لەلایەن موقتەدا سەدر ڕابەری ڕەوتی سەدرەوە ئاراستە دەكرێت، هۆكاریی سەرهەڵدانەوەی جموجۆڵ و چالاكییەكانی ئەم دواییەی ڕێكخراوی داعش ئاشكرا دەكات و دەڵێت، داعش لە شارەكاندا كۆتایی هاتووە و ئەوەی ئێستاش دەیكات، تەنیا بۆ خۆسەلماندنە.

ڕیاز مەسعودی، پەرلەمانتاری هاوپەیمانی سائیرون بە (خەڵك)ی ڕاگەیاند:”ڕێكخراوی تیرۆریستی داعش لە شارەكاندا كۆتایی هات، بەڵام لە شوێنە دوورەدەستەكان و ناوچە شاخاوییەكان و لادێكان، هێشتا پاشماوەی ئەو ڕێكخراوە ماوە”.

بە بۆچوونی پەرلەمانتارەكەی سائیرون:”ڕێكخراوی داعش لەئێستادا دوو بوونی هەیە، یەكەمیان لەشێوەی سەربازیدایە كە لە مەفرەزەكان و كاریی تاكەكەسیدا خۆی دەبینێتەوە، دووەم بوونی ئایدۆلۆژییە كە لەلایەن هەندێك لە هێزە توندڕەوەكانەوە پەیڕەو دەكرێت، بۆیە لەگەڵ نزیكبوونەوەی هەڵبژاردنەكان، هەندێك لە هێزەكان دەیانەوێت ئەوەی ڕوودەدات بقۆزنەوە و هێزە تاریكستانییەكانیش لەو ڕێگەیەوە دەیانەوێت خۆیان بسەلمێنن و كاریی تێكدەرانە ئەنجام بدەن”.

مەسعودی پێیوایە:”فاكتەری سەرەكی كردەوەكانی ئەم دواییەی داعش بۆ خۆسەلماندنە، لەگەڵ ئەمەشدا نەبوونی هاوسەنگی لە ناوچەكە هۆكارێكی تری دەركەوتنەوەی جموجۆڵی ڕێكخراوەكەیە، بە تایبەت گەر تەماشای ڕووداوەكان بكەین لە سوریا و توركیا، لەوبڕوایەداین هەناردەكردنێكی میدیایی هەیە بۆ كردەوە تیرۆریستییەكان، بۆیە دەبێت هێزە سیاسییەكان بەئاگابن و ڕێگە نەدەن ئەم هەوڵانە زیاتر پەرەبستێنن”.