سەردێر

هێرشەكانی بەغدا شەرمەزار كران

خەڵك- بەشی هەواڵ

وەزارەتی دەرەوەی ئەمەریكا لە ڕاگەیەنراوێكی رۆژنامەوانی دا هەڵوێستی سەبارەت بە دوو هێرشە خۆكوژییەكە دەربڕی كە رۆژی پێنج شەممە لە بەغدا روویان دا.

بەپێی هەواڵی رادیۆ دەنگی ئەمریكا، دانیەل بی، سمێت كە بە شێوەی كاتی كارەكانی وەزیری دەرەوەی ئەمەریكا بەڕێوەدەبات، ڕۆژی پێنج شەمە لە ڕاگەیەنراوێكدا كە لە سەر ماڵپەری فەرمی وەزارەتی دەرەوەی ئەمەریكادا بڵاوبووەتەوە دەڵێت: “ئێمە بەتوندترین شێوە هێرشەكانی تێرۆریستی ئەمرۆ لە بەغدا دا مەحكوم دەكەین. كە لانیكەم ٣٢ كەسیان كوشت و ژمارەیەكی زیاتریشیان بریندار كرد. كرداری كوشتنی بە كۆمەڵ و وەبیرهێنەرەوەیەكی گەلێك ناخۆشی تێروریزمە كە درێژەی هەیە و هەڕەشە لە ژیانی عیراقییەكانی بێ تاوان دەكات”.

وتیشی “ئێمە سەرەخۆشی قووڵی خۆمان بۆ بنەماڵەكانی قوربانیان دەنێرین و هیوادارین ئەوانەی بریندارن بە زوویی چاك ببنەوە.”

بەرەبەیانی دوێنێ لە دوو هێرشی خۆكوژیدا لە بەغدا 32 كەس كوژران و زیاتر لە 100 كەسی دیكەش بریندار بوون.

رێكخراوی تیرۆرستی داعش شەوی رابردوو بەرپرسیارێتی خۆی لەو هێرشانە راگەیاند.