سەردێر

پارەی ژینگە دەدرێتە مووچە

خەڵك-ئارام سەردار

سەرۆكی دەستەی پاراستن و چاككردنی ژینگەی هەرێمی كوردستان ڕایدەگەیەنێت، بەپێی یاسا سندوقی ژینگە ڕێكخراوە و بەپێی ژمارەش پارە لەسندووقەكە هەیە، بەڵام لەگەڵ بارودودۆخی ئابووری هەرێمی كوردستان ئێستا پارەی ئەو سندوقە وەكو خۆی بۆ ژینگە بەكارنایەت.
عەبدولڕەحمان سەدیق، دەشڵێت، لەماوەی ١٠ ساڵی ڕابردوو زیاتر لەملیۆنێك دارستانی هەرێمی كوردستان سووتاون.

“پێویستمان بە پەیامنێر و ڕۆژنامەنووسی ژینگەيی هەیە”

عەبدولڕەحمان سەدیق، سەرۆكی دەستەی پاراستن و چاككردنی ژینگە ڕایدەگەیەنێت، ئێمە لەبیری ئەوەداین بەهاوكاری سەندیكای ڕۆژنامەنووسانی كوردستان پەیامنێر و ڕۆژنامەنووسی ژینگەیی وەك تایبەتمەندی كاركردن هەبێت، چونكە وەڵامی باش پرسیاری باشی دەوێت كە پسپۆڕی هەبێت لەم بوارە، كە بەداخەوە تائێستا ئەوەی لەسەر ژینگە پرسیار دەكرێت پرسیاری دووبارە و باون.

دەشڵێت، دەستەی پاراستنی چاككردن و ژینگە دەستەیەكی چاودێری و بەدواداچوونە، سێ كاری سەرەك هەیە، یەكەم مۆڵەتدان بەپڕۆژە جۆراوجۆرەكان و ڕەتكردنەوەی مۆڵەتی ئەو پڕۆژانەی پابەندی ڕێنماییەكان نابن، دووەم ئەنجوومەنی پاراستن و چاككردنی ژینگەیە كە لە ١٤ وەزارەت پێكدێت مانگانە كۆدەبینەوە، ئەنجوومەنەكە بۆ ئەوەیە بەوان دەڵێین چی بكەن و چیتان كردووە پێچەوانەی كاری ژینگە بووە، كاری سێیەم كلتووری پاراستنی ژینگە، لەگەڵ ٢٢٠ ڕێكخراوی ژینگەیی لەسەر ئاستی پارێزگاكان بۆردمان هەیە مانگانە كۆدەبینەوە، لەم كابینەیەش كە ژینگە وەك گەورەترین سەرمایەی ئەو وڵاتە دەست نیشان كراوە كاری ئێمە دیاری كراوە، خاڵێكی تریش مەترسییەكانی سەر ژینگە كەم بكەینەوە و بیپارێزین.

پارەی سندووقی ژینگە بۆ ژینگە بەكارنایەت

عەبدولڕەحمان سەدیق، سەرۆكی دەستەی پاراستن و چاككردنی ژینگە، سەبارەت بە سندووقی پارەی ژینگە لەشۆفێران رونیكردەوە بەپێی یاسا ئەو سندوقە ڕێكخراوە و بەپێی ژمارەش پارەكە لەسندووقەكە هەیە، لەگەڵ باردوودۆخی ئابووری هەرێمی كوردستان ئێستا پارەی ئەو سندوقە وەكو خۆی بۆ ژینگە بەكارنایەت، بەڵام لەهەمان كاتدا پارەكە لە ٢٠٪ی بۆ وەزارەتی ناوخۆ دەڕوات ولە٨٠ی دەبێ بگەڕێتەوە بۆ سندووقەكە، ئەوەی گرفتە باروودۆخی ئابوورییە كە ئێمەی خستۆتە دوو بژاردە، ئەویش چۆن بڵێین دەست بۆ پارەی سندوق مەبەن و پارەی قووتی مووچەخۆران مەدەن، لەئەنجامدا حكومەت چۆن دەستی بردووە بۆ سندوقی خانەنشینی، دەستی بۆ ئەو سندوقەش بردووە.

دەبێ ژینگەی سیاسی و ئابووری و كۆمەڵایەتی لەباربێت

بۆ پاراستنی ژینگە، عەبدولڕەحمان سدیق، ڕوونیكردەوە، دەبێ ژینگەی سیاسی و ئابووری و كۆمەڵایەتیمان لەباربێت، بۆیە هەموو هەوڵەكانمان بۆ گەیاندنی ژینگەیە بەستانداردی نێودەوڵەتی، تاوەكو سیاسەتێكی ژینگەیی تەندروستمان هەبێت، پێویسته ژینگەیەكی سیاسی و ئابووری و كۆمەڵایەتی تەندروستمان هەبێت.

لە٨٠٪ی دانیشتوان لەنێوەندی شارەكان دەژین

عەبدولڕەحمان سدیق سەبارەت بەهۆكارەكانی پیسبوونی ژینگە ئەوەی خستەڕوو، ئامێرەكانی پێوانی ژینگە لەڕووی پیسبوون و خاوێنی لەئاستی پێویستی ئێمە نییە، هەر بڕیارێكیش بدرێت لەسەر ژینگە پێویستە بەراوردی بكەین و ئەوەش پێویستە پێوانمان هەبێت، ملیۆنێك و ٧٧٦ هەزار هۆكاری گواستنەوە هەیە لەكوردستان لە ٨٠٪یان هۆكاری گواستنەوەی تایبەتن، ئەمەش بەهۆی نەبونی هێڵی گواستنەوەی گشتی، هۆكارێكی تریش زیادبوونی ژمارەی دانیشتووان، نزیك پەنجا ساڵ بەر لەئێستا لە٥٨٪ی دانشتووانی پارێزگای سلێمانی و ٦٢٪ی دانیشتوانی هەولێر و ٦٧٪ی دانیشتوانی دهۆك لەلادێكان بوون، واتە كەمینەیەك لەشارەكان بوون، بەڵام ئێستا لە٨٠٪ی دانیشتوان لەشارەكان دەژین، لەكاتێكدا پێشتر لە ٣٨٪ی دانیشتوان لەنێوشارەكان بوون، كارگەكانیش زۆربەیان لەسنووری شارەوانیەكاندان ئەمەش هۆكارن.

مەرجەكانی ناشناڵ پاڕك دیاری دەكەن

عەبدولڕەحمان سدیق، لەبارەی دروستكردنی ناشناڵ پاڕك دەڵێت بەپێی پەیڕەو هەمانە، بەڵام مەرجەكانی تێدانییە بە چ شوێنێك بوترێت ناشناڵ پاڕك، لەبەر ئەوە دەبێت سوود لەعیراق وەربگرین كە پەیڕەوێكیان داناوەو لەڕێگای لیژنەیەك سەردانی شوێنەكە دەكرێت و ئەنجوومەنی وەزیران دەبێ پەسەندی بكات، بۆیە ئێمە سەرقاڵی هەمواری پەیڕەوی دیاری كردنی شوێنەكانین وەك ناشناڵ پاڕك.

لەماوەی ١٠ ساڵ زیاتر لەملیۆنێك دارستان سووتاون

عەبدولڕەحمان سدیق، سەرۆكی دەستەی پاراستن و چاككردنی ژینگە باسی لەوەكرد، لەماوەی ساڵی ٢٠١٠تا ٢٠٢٠ ساڵ بۆ ساڵ لەڕێگای تۆپبارانەكانی توركیا و ئێران و خەڵكی ناوخۆ و دەرەوە زیاتر لەملیۆنێك و ١٠٠ هەزار دۆنم لەدارستانەكانی ئێمە سوتاون، قەرەبووكردنەوەی ئەمەش ئاسان نییە، بۆ ئەمە نوسراومان كردووە بۆ وەزیری داد كە ئێستا لەدونیادا سەرپێچی ژینگەیی نەماوە، بەڵكو بۆتە تاوانی ژینگەیی، كاتێك كەسێك دەچێتە شوێنی گەشتیاری هەزاران درەخت دەسووتێنێ چۆن دەتوانین قەرەبووی بكەینەوە، ئێستا وەڵاممان دراوەتەوە كەوا دادگای ژینگەیی هەبێت یان دادوەرێكی ژینگە دابنرێت بۆ سزادانی ئەو تاوانە قوڕسانەی بەسەر ژینگە دێن.

عەبدولڕەحمان سدیق، دەڵێت، دەبێ ژینگه بپارێزین، بەكارهێنانی دەمامك بۆ خۆپاڕاستن لە نەخۆشی شتێكی باشە، بەڵام خۆڕزگاركردن لە دەمامك مەترسیدارترە، هەموو پاشماوە تەندروستییەكان نابێت تێكەڵ بكرێت بە پاشماوەی تر، چونكە نابێت بسووتێنرێت، ئەگەر ئەوەبكرێت زبڵخانەی ئاسمانی دروست دەبێت و دەبێتە هۆكاری نەخۆشی شێرپەنجه، بۆیە ئەوەی ئیشی لەسەر دەكەین هۆشیاری و بەرقەراركردنی یاسایە.