سەردێر

پۆلیسی هەولێر: لە ساڵی 2020دا زیاتر لە 10 هەزار 500 تاوان لە تۆڕە كۆمەڵایەتییەكاندا سكاڵایان لەبارەوە تۆمار كراوە

خەڵك

وتەبێژی بەڕێوەبەرایەتی پۆلیسی هەولێر ڕایدەگەیەنێت، تۆڕە كۆمەڵایەتییەكان كاریگەرییەكەیان هێندە زۆرە كە ئێستا زۆرینەی تاوانەكان لە ڕێگەی تۆڕە كۆمەڵایەتییەكانەوە دەكرێن و “زۆر جار پیاوانی بەتەمەن لەلایەن ئافرەتانەوە دەخەڵەتێنرێن.”

موقەدەم هۆگر عەزیز، وتەبێژی بەڕێوەبەرایەتی پۆلیسی هەولێر ڕایگەیاند: “لە تۆڕە كۆمەڵایەتییەكاندا زۆر جار پیاوانی بەتەمەن لەلایەن ئافرەتانەوە دەخەڵەتێنرێن. باند هەبووە لە مەغریب و لە وڵاتانی تری جیهان پەیوەندییان بە خەڵكەوە دەكرد و چەندین هەزار دۆلاریان بۆ نێردراوە بەس لەبەر ئەوەی ڤیدیۆكانیان بڵاونەكرێتەوە.”

وتەبێژی بەڕێوەبەرایەتی پۆلیسی هەولێر ئاماژەی بەوەشدا، لە ساڵی 2020ـدا لە هەولێر 10 هەزار و 684 تاوان لە تۆڕە كۆمەڵایەتییەكاندا سكاڵایان لەبارەوە تۆمار كراوە و نۆ هەزار و 850 تاوانیان یەكلایی بوونەتەوە.

موقەدەم هۆگر عەزیز وتیشی: “تۆڕە كۆمەڵایەتییەكان كاریگەرییەكەیان هێندە زۆرە كە ئێستاكە زۆرینەی تاوانەكان لە ڕێگەی تۆڕە كۆمەڵایەتییەكانەوە دەكرێن. بۆ نمونە هەڕەشەكردن، كڕین و فرۆشتن بە كاڵای ماوە بەسەرچووەوە، كڕین و فرۆشتنی چەكی بێمۆڵەت، فێڵ بۆ دابینكردنی ڤیزای وڵاتان و گەلێك كاری تر.”

جێی ئاماژەیە، لە هەرێمی كوردستان یاسای ژمارە 6ی ساڵی 2008 تایبەتە بە خراپ بەكارهێنانی ئامێرەكانی پەیوەندیكردن. لە ماددەی 2دا سزای بۆ ئەو كەسانە داناوە كە لە ڕێگەی تۆڕە كۆمەڵایەتییەكانەوە هەڕەشە لە خەڵكی دەكەن. كە سزاكەی بەندكردنە لە شەش مانگەوە تا پێنج ساڵ. سزای ماددیەكەیشی لە ملیۆنێك دینارەوە تا پێنج ملیۆن دینارە.