سەردێر

داهاتەكانی حكومەتی هەرێم ئاشكراكران

"پێشتر حكومەتی هەرێم نەوتی بە هەرزان فرۆشتووە و ئێستا دەبێت خەڵكی كوردستان باجەكەی بدات"

خەڵك

ئەندامێكی پەڕلەمانی كوردستان داهاتەكانی حكومەتی هەرێم ئاشكرا دەكات و دەڵێت، مانگانە لە كۆی‌ (یەك ترلیۆن و ٢١٥ ملیار) دیناری‌ داهاتی‌ نەوت، تەنها (٥١٢ ملیار) دینار دەگەڕێتەوە خەزێنەی‌ گشتی‌.

عومەر گوڵپی، ئەندامی پەڕلەمانی كوردستان لە كۆنگرەیەكی رۆژنامەوانیدا ڕاپۆرتێكی لە بارەی داهاتەكانی حكومەتی هەرێمەوە خستەڕوو ڕایگەیاند، پاش بەدواداچوونی‌ ورد، لە ڕێگەی‌ (١٠١) دۆسیەی‌ بەدواداچوونی‌ سەرەكی‌ كە (٣٥٠)بەدواداچوونی‌ لاوەكیان لە خۆگرتووە لەگەڵ وەزارەتەكانی‌ (دارایی‌، سامانە سروشتیەكان، بازرگانی‌) و سەرۆكایەتی‌ ئەنجومەنی‌ وەزیران و دیوانی‌ چاودێری‌ دارایی‌، هەروەها كۆبوونەوەو سەردانی‌ مەیدانی‌، سەبارەت بە داهات و خەرجیەكان، گەیشتینە ئەم ئەنجامانەی‌ خوارەوە:
تەوەری‌ یەكەم/ داهاتەكان:
١ـ داهات لە سەرچاوەی‌ (نەوت)ەوە:

بە پێی‌ زانیاریی‌ وەزارەتی‌ سامانە سروشتیەكان كە تەنها ڕاپۆرتەكانی‌ دیلۆیتن، لە ئێستەدا مانگانە لە كۆی‌ (یەك ترلیۆن و ٢١٥ ملیار) دیناری‌ داهاتی‌ نەوت، تەنها (٥١٢ ملیار) دینار دەگەڕێتەوە خەزێنەی‌ گشتی‌، ئەمەش بە نزیكەیی‌ لە (٤٢%)ی‌ داهاتی‌ نەوت دەكات.

كێشەكە چییە؟ بۆچی‌ لەو بڕە پارە زۆرە تەنها ئەوەندە دەگەڕێتەوە خەزێنەی‌ گشتی‌؟
أ ـ گرێبەستی‌ خراپ (گرێبەستی‌ هاوبەشی‌ لە بەرهەم) لەگەڵ كۆمپانیای‌ بیانی‌.
ب ـ نەبوونی‌ چاودێری‌ و وردبینی‌ و پیاچوونەوە لە خەرجیەكانی‌ تێچووی‌ پرۆسەی‌ وەبەرهێنان.(لەم بارەیەوە حكومەت پیاچوونەوی‌ تەنها بە یەك كێڵگەی‌ نەوتدا كردووە، دەركەوتووە كۆمپانیا بیانیەكە بڕی‌ پێویست لە پارەی‌ خەرجیەكانی‌ خۆی‌ وەرگرتووە، بەڵام بەردەوام بووە لە وەرگرتنی‌ پارە!).
ج ـ گرێبەستی‌ خراپ لەبەرژەوەندی‌ كەس و لایەنی‌ ناوخۆیی‌ بەبێ ڕەچاوكردنی‌ بەرژەوەندی‌ گشتی‌.
د ـ فرۆشتنی‌ نەوتی‌ پێشوەختە بە نرخی‌ كەمتر لە نرخی‌ بازاڕ.
تێبینی‌: ئەگەر وردبینی‌ لە دۆسیەی‌ نەوت بدرێتە دەست دیوانی‌ چاودێری‌ دارایی‌، پیاچوونەوە بە گرێبەستی‌ كۆمپانیاكانی‌ خزمەتگوزاری‌ بكرێت، پیاچوونەوە بە خەرجی‌ كۆمپانیاكانی‌ وەبەرهێنان بكرێت، پیاچوونەوە بە گرێبەستی‌ سەرەكی‌ لەگەڵ كۆمپانیاكانی‌ وەبەرهێنانی‌ نەوت بكرێت، ئەوە دەكرێت ئەو ڕێژە لە داهات بەلای‌ كەمەوە بگەیەنرێتە (٧٥٠ ملیار دینار) لە مانگێكدا، كە دەكاتە ڕێژەی‌ (٦٠%)ی‌ داهاتی‌ نەوت.
سەرپێچی‌ و گەندەڵی‌ لە دۆسیەی‌ نەوت چیە؟
ا ـ ڕێگەگرتن لە دیوانی‌ چاودێری‌ دارایی‌ بۆ وردبینی‌ و پشكنین لە دۆسیەی‌ نەوت.
ب ـ نادیاریی‌ و ناشەفافی‌ لە زانیارییەكانی‌ پەیوەست بە نەوت.
ج ـ ئەنجامدانی‌ گرێبەستی‌ خزمەتگوزاریی لە دەرەوەی‌ یاساو ڕێنماییە بەركارەكان.
د ـ پێدانی‌ بڕی‌ (٢٢,٠٠٠) بەرمیل نەوتی‌ ڕۆژانە بە قۆرخكاریی‌ بە (كۆمپانیای‌ كار)و فرۆشتنەوەی‌ بەرهەمەكەی‌ تەنها بە دوو كۆمپانیا بە شێوەی‌ قۆرخكاریی‌ (ئەم بابەتە كراوەتە یەكێك لە تەوەرەكانی‌ “پرساندن” بۆ وەزیری‌ سامانە سروشتیەكان).
٢ـ داهات لە سەرچاوەی‌ (گومرگ)ەوە:
بە پێی‌ زانیارییەكانی‌ ئەو كۆبوونەوەی‌ كە ڕۆژی‌ (١٩ی‌ ١٢ی‌ ٢٠٢١) لە نێوان لیژنەی‌ دارایی‌ و نوێنەرانی‌ ئەنجومەنی‌ وەزیران بەڕێوەچوو، لە ساڵی‌ (٢٠٢١) بڕی‌ داهاتی‌ گومرگ بریتی‌ بووە لە (١٣٩ ملیار دینار) وەك تێكڕا بۆ هەر مانگێك، ئەمەش زۆر كەمترە لەو بڕەی‌ كە ئێمە خەمڵاندنمان بۆ كردووە بە نزیكەی‌ (٣٠٠ ملیار) دیناری‌ مانگانە.
هۆكاری‌ كەمی‌ داهاتی‌ گومرگ، هەروەها گەندەڵی‌ لە دۆسیەی‌ گومرگ چیە؟
أ ـ پێدانی‌ ژمارەیەك خزمەتگوزاری‌ بە ژمارەیەك كۆمپا، بەبێ ڕەچاوكردنی‌ یاساو ڕێنماییە بەركارەكان و دوور لە چاودێری‌ پەرلەمانتاران و دیوانی‌ چاودێری‌ دارایی‌، لەم بارەیەوە بەرپرسانی‌ گومرگ و وەزارەتی‌ دارایی‌ ڕێگە نادەن تیمەكانی‌ چاودێری‌ دارایی‌ وردبینی‌ لە داهاتەكان بكەن، ئەوەش بۆ ئەوەی‌ گەندەڵی‌ و سەرپێچیە داراییەكان ئاشكرا نەبن.
سەبارەت بەو كۆمپانیایانەی‌ كە گرێبەستیان بۆ كراوە بەبێ ڕەچاوكردنی‌ یاساو ڕێنماییەكان، تەنها لە خاڵە سنورییە گومرگیەكان بریتین لە (٢٠) كۆمپانیا بەناوەكانی‌ (بارگێڕان، كۆریدۆر، دڵنیا، دیاسە، هانداون، kpr، لۆكس ئەیجنسی‌، نیو ئایتی‌ ئێرا، نیو ستاندار، ڕەزگە، ڕۆژان، سدیق، ستار كار، ئاسمانی‌ كوردستان، كەلیت، شەو و ڕۆژ، قەپان، اشرقت – العواد، جبل القزا، Issuance )، هەروەها ژمارەیەكی‌ تر لە كۆمپانیا لە فڕۆكەخانەكانی‌ سلێمانی‌ و هەولێر.

تێبینی‌: ئەم كۆمپایایانە بوونەتە هۆی‌ زیانگەیاندن بە داهاتی‌ گەشتی‌ بە نزیكەی‌ (١٠٠ ملیار) دیناری‌ مانگانە.

ب ـ لێخۆشبوونی‌ گومرگی‌ كە زۆرێكی‌ بە نایاساییە.
ج ـ فرت و فێڵی‌ گومرگی‌.
د ـ خراپی‌ بەرێوەبردن لە خاڵە گومرگیە سنورییەكان.
٣ـ داهات لە سەرچاوەی‌ (باج)ەوە:
بە پێی‌ زانیاریی و بەدواداچونەكان، داهاتی‌ باج لە ساڵی‌ (٢٠١٩) بە تێكڕا بۆ هەر مانگێك (٥١ ملیار) دینار بووە، لە ساڵی‌ (٢٠٢٠) داهاتەكان بریتی‌ بووە لە (٤٥ ملیار) دینار، لە ساڵی‌ (٢٠٢١) دابەزیوە بۆ (٤٠ ملیار) دینار!
تێبینی‌: بە پێی‌ لێدوانی‌ بەرپرسان و سەپاندنی‌ هێندێك جۆری‌ باج لەدەرەوەی‌ یاسا، دەبوو داهاتی‌ باج زیاد ببێت، بەڵام بەپێچەوانەوە ساڵ بە ساڵ داهاتی‌ باج كەمی‌ كردووە، ئەمەش ئەو پرسیارە دروست دەكات: بۆچی‌ داهاتی‌ باج لە (٥١ ملیار) دینارەوە دابەزیوە بۆ (٤٠ ملیار) دینار؟ بەتایبەت ئەم داهاتانە لە پارێزگاكانەوە كۆ دەكرێنەوە.
٤ـ داهات لە سەرچاوەی‌ (ڕسومات و كرێی‌ خزمەتگوزاریی)ەوە:
بە پێی‌ زانیارییەكان، داهاتی‌ ڕسومات مانگانە بریتیە لە (٧٥ ملیار) دینار، كە زۆرینەی لە داهاتی‌ كارەباوە سەرچاوە دەگرێت كە بریتیە لە (٣٢) ملیار دینار.
بەپێی‌ هەڵسەنگاندنی‌ ئێمە، داهاتی‌ ڕسومات لە مانگێكدا نزیكەی‌ (١٠٠ ملیار) دینارە، واتە جیاوازیی نێوان زانیارییەكانی‌ حكومەت و بەدواداچوون و هەڵسەنگاندنی‌ ئێمە بریتیە لە (٢٥ ملیار) دیناری‌ مانگانە.
كۆی‌ گشتی‌ داهاتی‌ ناوخۆ:
بەپێی‌ ئەو زانیارییانەی‌ لە كۆبوونەوەكەی‌ ئەنجومەنی‌ وەزیران وەرمانگرتن، تێكڕای‌ داهات لە گومرگەوە بۆ مانگێك بریتیە لە (١٣٩ ملیار) دینار، لە باجەوە بریتیە لە (٤٠ ملیار) دینار، لە ڕسوماتەوە بریتیە لە (٧٥ ملیار) دینار، واتە كۆی‌ گشتی‌ ئەو سێ سەرچاوەیە بریتیە لە (٢٥٤ ملیار دینار).
بەڵام بە پێی‌ زانیارییەكانی‌ هەمان كۆبوونەوە، كۆی‌ داهاتی‌ ناوخۆ (واتە گومرگ و باج و ڕسومات) پێكەوە بۆ هەر مانگێك تێكڕای‌ بریتیە لە (٣١٦ ملیار) دینار، بەمجۆرە (مانگی‌ یەك ٢٠٧ ملیار، مانگی‌ دوو ٣٠٦ ملیار، مانگی‌ سێ ٣١٠ ملیار، مانگی‌ چوار ٢٨٧ ملیار، مانگی‌ پێنج ٣١٨ ملیار، مانگی‌ شەش ٣٩٠ ملیار، مانگی‌ حەوت ٢٨٤ ملیار، مانگی‌ هەشت ٣٠٨ ملیار، مانگی‌ نۆ ٣٧٩ ملیار، مانگی‌ دە ٣٧٣ ملیار) دینار.
پاش بەراوردكردنی‌ هەردوو زانیارییەكە، كۆی‌ گشتی‌ داهات لەهەر سەرچاوەیەكی‌ (گومرگ، باج، ڕسومات) لەگەڵ كۆی‌ گشتی‌ داهاتەكان، تێبینیمان كرد جیاوازی‌ نێوانیان (٦٢ ملیار) دینارە لە مانگێكدا! ئەوەش بەمجۆرە: (٣١٦ – ٢٥٤ = ٦٢ ملیار دینار)! ئەمەش یەكێك لە سەیرو سەمەرەكانە، چونكە ئەگەر داتاو زانیارییەكان دروستن، سەرچاوەی‌ ئەو (٦٢) ملیارە چییە؟
پاشان: بە پێی‌ ڕاگەیەنراوی‌ نووسینگەی‌ جێگری‌ سەرۆكی‌ حكومەت، بۆ مووچەی‌ مانگەكانی‌ (٦ تا ١١)، تەنها بڕی‌ (١٦٤ ملیار دینار) لە داهاتی‌ ناوخۆ بۆ مووچە بەكارهاتووە، لە كاتێكدا لەو مانگانەدا بە تێكڕا داهاتی‌ ناوخۆ مانگانە (٣٤٦ ملیار) دینار بووە، واتە كاتێك (٣٤٦ – ١٦٤= ١٨٢) واتە: لەو شەش مانگەدا هەموو مانگێك (١٨٢ ملیار دینار) داهاتی‌ ناوخۆ زیاتر بووە لە پێویستی‌ مووچە، هەربۆیە ئەو پرسیارە دێتە پێشەوە:
كۆی‌ ئەو داهاتەی‌ لە ناوخۆ زیادبووە لە پێویستی‌ مووچە لە پێنج مانگی‌ ٢٠٢١ (واتە مانگی‌ ٦ تا مانگی‌ ١١) بریتی بووە لە (٩١٠ ملیار) دینار، لەو بارەیەوە دەپرسین چی‌ لێكراوە؟ بۆچی‌ بەكار هاتووە؟ لە كاتێكدا ئەگەر بوترێت بۆ خزمەتگوزاری‌ و بەگەڕخستن بەكارهێنراوە، ئەوە تەنها نزیكەی‌ (٥٠٠ ملیار) دیناری‌ پێویست بووە خەرج بكرێت بە پێی‌ زانیاریی‌ خەرجییەكان، كەواتە ئەو (٤١٠ ملیار) دیارەكەی‌ تر چی‌ لێهات؟
(تێبینی‌: ئەم پرسیارە تەنانەت ئەو بەڕێزانەی‌ لە كۆبوونەوەكە ئامادەبوون نەیانتوانی‌ وەڵامی‌ بدەنەوە).
تەوەری‌ دووەم/ خەرجیەكان:
بەپێی‌ زانیارییەكان، مانگانە هەرێمی‌ كوردستان پێویستی‌ بە (٩٩٨ ملیار) دینار هەیە بۆ خەرجیەكانی‌، ئەویش بەمجۆرە: بڕی‌ (٩٠٢ ملیار) دینار بۆ مووچە، بڕی‌ (٩٦ ملیار) دینار بۆ بەگەڕخستن و پڕۆژەكان.
دەرئەنجام و پوختەی‌ بەدواداچوون:
ئەنجامی‌ یەك/ هاوكێشەی‌ داهات و خەرجی‌ بە پێی‌ زانیارییەكانی‌ حكومەت:
١ـ بەپێی‌ زانیارییە فەرمیەكان، تێكڕای‌ داهاتی‌ كوردستان بۆ مانگێك بریتیە لە (یەك ترلیۆن و ١١١ ملیار) دینار، بەمجۆرە: بڕی‌ (٥١٢ ملیار دینار) داهاتی‌ نەوت، بڕی‌ (٣٧٣ ملیار) دینار داهاتی‌ ناوخۆ كە (گومرگ و باج و ڕسومات) دەگرێتەوە، بڕی‌ (٢٠٠ ملیار) دینار داهات لە بەغداوە، بڕی‌ (٢٦ ملیار) دینار لە هاوپەیمانانەوە.
٢ـ خەرجیەكانی‌ هەرێم بریتین لە: بڕی‌ (٩٩٨ ملیار) دیناری‌ مانگانە بۆ مووچەو خەرجیەكانی‌ بەگەڕخستن و خزمەتگوزارییەكان و پرۆژەكان.
٣ـ تەرازوی‌ نێوان داهات و خەرجی‌: جیاوازی‌ نێوان داهاتوو خەرجی‌ بەمجۆرەیە (١,١١١ (داهات) – ٩٩٨ (خەرجی‌) = + ١١٣ ملیار) دینار، واتە جیاوازی‌ نێوان داهات و خەرجی‌ بریتیە لە (١١٣ ملیار) دینار زیادەی‌ داهات، ئەوە بە پێی‌ زانیارییەكانی‌ دەستكەوتوو لە ئەنجومەنی‌ وەزیران و وەزارەتەكانی‌ دارایی‌ و سامانە سروشتیەكان.
ئەنجامی‌ دوو/ هاوكێشەی‌ داهات و خەرجی‌ بەپێی‌ خەمڵاندن و بەدواداچوونەكانی‌ ئێمە:
بە پێی‌ بەدواداچوون و هەڵسەنگاندنی‌ ئێمە، پێویستە تێكڕای‌ داهات لە سەرچاوەكانیانەوە مانگانە (یەك ترلیۆن و ٢٨١ ملیار) دیناربێت، بەمجۆرە:
لە نەوتەوە (٦٠٠ ملیار) دینار، لە گومرگەوە (٣٠٠ ملیار) دینار، لە باجەوە نزیكەی‌ (٥٥ ملیار) دینار، لە ڕسوماتەوە (١٠٠ ملیار) دینار، لە هاوپەیمانانەوە (٢٦ ملیار) دینار، لە بەغداوە (٢٠٠ ملیار) دینار.
واتە جیازای‌ نێوان خەمڵاندنی‌ ئێمە بۆ داهات و زانیارییەكانی‌ حكومەت بۆ داهات بریتیە لە ( ١٧٠ ملیار) دیناری‌ مانگانە!
ئەنجامی‌ سێ/ گەندەڵی‌ و سەرپێچیە داراییەكان چین كە بوونەتە هۆی‌ كەمبوونەوەی‌ بەرچاوی‌ داهات؟
١ـ ڕێگە نەدان بە دیوانی‌ چاودێری‌ دارایی‌ بە وردبینی‌ و پشكنین لە دۆسیەی‌ نەوت بە پێی‌ یاسا بەركارەكان.
٢ـ بوونی‌ ژمارەیەكی‌ زۆر لە كۆمپانیا لە بواری‌ خزمەتگوزاری‌ لە خاڵە سنورییە گومرگیەكان و فرۆكەخانەكان و كێڵگەكانی‌ نەوت كە بوونەتە هۆی‌ زیانی‌ گەورە بە هەرێمی‌ كوردستان كە گرێبەستە نایاساییەكان لە ئەنجومەنی‌ وەزیران و وەزارەتەكانی‌ دارایی‌ و سامانە سروشتیەكان ئەنجام دراون بە جۆرێك لە هێندێكیاندا تەنها (٥% – لە سەدا پێنج)ی‌ داهاتی‌ كۆمپانیاكە بۆ خەزێنەی‌ گشتیە!
٣ـ نەبوونی‌ یاسای‌ بودجەو نەبوونی‌ شەفافیەت و ڕوونكاریی‌ لە داهات و خەرجییەكان، بەجۆرێك وەزارەتەكانی‌ دارایی‌ و سامانە سروشتیەكان و سەرۆكایەتی‌ ئەنجومەنی‌ وەزیران ئامادە نین هیچ دۆكیومێنت و بەڵگەیەك بدەنە دیوانی‌ چاودێری‌ دارایی‌ و لیژنەكانی‌ پەرلەمان لەسەر داهات و خەرجییەكان و وردەكارییەكانیان بە پێی‌ سەرچاوەكانی‌ داهات و بوارەكانی‌ خەرجی‌، ئەمەش بووتە هۆی‌ دروستكردنی‌ دۆخێكی‌ تاریك لە بواری‌ دارایی‌.
٤ـ بەڕوونی‌ دیارە كە بەشێك لە داهاتەكان لە پارێزگاكانەوە ناگەرێنەوە خەزێنەی‌ گشتی‌، ئەو بەشەش بە بڕی‌ (١٠٠ تا ١٢٠ ملیار) دیناری‌ مانگانە دەخەمڵێنرێن.
ئەنجامی‌ چوار/ كێ بەرپرسە لەم دۆخە خراپەی‌ بەڕێوەبردنی‌ دارایی‌ و پرسی‌ ئابوری‌ لە هەرێمی‌ كوردستان؟
بە پێی‌ یاسا بەركارەكان و بەرپرسیارێتی‌ دامەزراوەیی‌، بەرپرسیاری‌ سەرەكی‌ بریتیە لە (سەرۆكی‌ ئەنجومەنی‌ وەزیران، جێگری‌ سەرۆكی‌ ئەنجومەنی‌ وەزیران، وەزیری‌ دارایی‌، وەزیری‌ سامانە سروشتیەكان)، ئەم بەرێزانە لە ڕووی‌ یاسایی‌ و سیاسیەوە بەرپرسیاری‌ ئەم دۆخە خراپەی‌ نەبوونی‌ شەفافیەت و جێبەجێ نەكردنی‌ یاساكانن كە دەرئەنجام بووەتە هۆی‌ ئەوەی‌ داهاتی‌ هەرێمی‌ كوردستان لە بڕێكەوە كەبەشی‌ چارەسەری‌ زۆرینەی‌ كێشە سەرەكیەكانی‌ هەرێم بكات بێتە سەر ئەوەی‌ كە نەتوانرێت وەڵامی‌ خواستی‌ خەڵك و گەنجان و گیروگرفتەكان بدرێتەوە.
ئەنجامی‌ پێنج/ هەنگاوی‌ كرداری‌ ئێمەی‌ پەرلەمانتاران چییە بۆ چارەسەری‌ ئەو دۆخە خراپەی‌ بەڕێوەبردنی‌ دارایی‌؟
١ـ بەردەوامبوون لەسەر گرتنەبەری‌ ڕێكاری‌ پەرلەمانی‌ و بەدواداچوونی‌ پەرلەمانی‌.

٢ـ هەوڵدان بۆ وردبینی‌ لە داهاتەكان لە ڕێگەی‌ دیوانی‌ چاودێری‌ دارایی و تیمەكانیان و دەرخستنی‌ زیاتری‌ ڕاستیەكان لە رێگەی‌ پشكنین و وردبینی‌ داهات و خەرجی‌ لە سەرچاوەكانیانەوە.

٣ـ پرساندنی‌ وەزیرانی‌ پەیوەندیدار بۆ ئەوەی‌ بێنە پەرلەمانی‌ كوردستان و وەڵامی‌ پرسیاری‌ ئێمەو خەڵكی‌ كوردستانە بدەنەوە لەسەر داهات و خەرجییەكان( لەم بارەیەوە پرساندن بۆ وەزیری‌ سامانە سروشتیەكان لە سەرۆكایەتی‌ پەرلەمانەوە ئاراستەی‌ سەرۆكایەتی‌ ئەنجومەنی‌ وەزیران كراوە، هەروەها دۆسیەی‌ پرساندنیشمان لەسەر وەزیری‌ دارایی‌ كردووەتەوەو لە قۆناغی‌ كۆكردنەوەی‌ واژۆی‌ ژمارەی‌ یاسایی‌ ئەندامانی‌ پەرلەمانین).
٤ـ گرتنەبەری‌ ڕێوشوێنی‌ یاسایی‌ و جوڵاندنی‌ سكاڵا لە دادگا لە دژی‌ ئەو كەسانەی‌ ڕاستەوخۆ یان ناڕاستەوخۆ بەرپرسیارن و كار بەیاساكان ناكەن یا گرێبەستی‌ نایاسایی‌ ئەنجام دەدەن و دەبنە هۆی‌ بەفیڕۆدانی‌ سەروەت و سامانی‌ گشتی‌ و زانیارییەكان نادەنە پەرلەمانتاران و دیوانی‌ چاودێری‌ دارایی‌ و تیمەكانی.

لە كۆتاییدا دوو تێبینی‌ پێویست:
١ـ بۆ هەموو ئەم زانیارییانەی‌ سەرەوە، داتاو بەڵگەی‌ پێویستمان لەبەردەستە، دەتوانین یەك بە یەكی‌ بۆچوون و زانیارییەكانمان بە بەڵگەوە بسەلمێنین كە دەیان لاپەڕەن، بۆ ئەو مەبەستە ئامادەین سەرۆكایەتی‌ دیوانی‌ چاودێری‌ دارایی‌ بكەینە دادوەر لە نێوان ئێمەو وەزارەتی‌ دارایی‌ و وەزارەتی‌ سامانە سروشتیەكان و ئەنجومەنی‌ وەزیراندا، ئەگەر ئەوان ڕازیبن بەو دەزگا سەربەخۆیە بۆ یەكلا كردنەوەی‌ ئەوەی‌ ئێمە دەیڵێین، ئەوە ئێمە ئامادەین.
٢ـ هەر لەبەر ئەم زانیاریانەی‌ سەرەوە، من ئامادە نەبووم ڕاپۆرتی‌ ئامادەكراو لەلایەن بەرێزان لە خوشك و براكانمان لە لیژنەی‌ دارایی‌ لەسەر داهات و خەرجییەكانی‌ حكومەت واژۆ بكەم.