سەردێر

هێرشەكانی داعش و خۆپیشاندانەكان جوڵەی بازرگانییان لاوازكردووە

خەڵك

لەپاش دروستبوونی گرژییەكان بەهۆی خۆپیشاندانەكان هێزی ئەمنی لەهەندێك شوێنی ناوشاری سلێمانی جێگیركراون و هێرشەكانی چەند شەوی رابردووی داعش بۆسەر هێزەكانی پێشمەرگە كاریگەرییان لەسەر جوڵەی بازرگانی دروستكردووە.

یاسین ڕەحیم، جێگری سەرۆكی ژووری بازرگانی و پیشەسازی سلێمانی بە(خەڵك)ی ڕاگەیاند، لەهەر شوێنكی جیهان گرژی و ئاڵۆزی هەبێت و جێگیری سیاسی نەبێت، هەموو شتەكانی دیكەش جێگیرنابن و كاریگەرییان لەسەر دروستدەبێت، بەتایبەت ئیشوكاری بازرگانی و كاركردن پەیوەستە بەو بابەتەوە و كارگەر دەبێت.

باسی لەئەوەشكرد، بەداخەوە هێرشەكانی داعش بۆ سەر پێشمەرگە و هەر گرژییەكی دیكەی وەك نائارامییەكانی ئەم چەند ڕۆژە كە بەهۆی خۆپیشاندانەكانەوە دروستبووە و بڵاوەپێكردنی هێز لەناو شارەكان كاریگەرییان لەسەر جوڵەی بازرگانی هەیە.

ئاماژەی بەئەوەشدا، بەهۆی ئەو گرژییانەوە خەڵك ناتوانێت بەئارامی بچێتە نێو بازاڕەكانەوە بۆ شت كڕین و بازرگانەكانیش مەترسییان لەلا دروستدەبێت، كە دەستی تێكدەر لەنێو خۆپیشاندانەكانەوە كارێكی هەڵە بكات، بۆیە كۆمەڵێك لەبازرگانەكانیش هەندێك لەكارەكانیان ڕاگرتووە و شوێنكاریان داخستووە.

ئەوەشی باسكرد، هەنگاوی باش لەلایەن یەكێتیی نیشتیمانی كوردستانەوە نراوە بۆ چارەسەری كێشەی خوێندكاران، كە هیوادارە ئەم هەنگاوە داواكارییەكانی خوێندكاران پڕبكاتەوە و دووبارە خۆپیشاندان و ناڕەزایەتی دروستنەبێتەوە، كە دەستی تێكدەر لەناویاندا كاری هەڵە بكات.

وتیشی: ئەم هەرێمە هەرێمی هەموومانە، هەرێمی هیچ حزب و چین و كەسێك نییە، هەموومان ئازادین لەبیڕوڕا و مافی تاكەكەسی، بەڵام هەموو شتێك ڕێكاری خۆی هەیە، بۆیە پێویستە هەر داواكارییەكمان هەبێت بەئازادانە و ئاشتییانە داوای بكەین، نەهێڵین دەستی تێكدەر ئاڕاستەی خۆپیشاندانەكان بگۆڕێت و دەست بۆ ئەو شوێنانە درێژنەكرێن كە ژێرخانی ئابووری هەرێمەكەمانە، چونكە كێشەكان بە دانوستان و دیالۆگ چارەسەردەكرێن، بۆیە هیوادارین هەم لایەنی بەرپرس هەم خوێندكاران بەگفتوگۆ چارەسەری كێشەكان بكەن.

ئەمە لەكاتێكدایە لەچەند شەوی ڕابردوودا دووجار داعش هێرشی كردە سەر سەنگەرەكانی پێشمەرگە و بەهۆیەوە بریندار و شەهید هەن، هەروەها بەهۆی خۆپیشاندانەكانی خوێندكارانی زانكۆوە گرژی و ئاڵۆزی دروستبوو و بەهۆیەوە هێزی ئەمنی لەهەندێك شوێنی ناوشاری سلێمانی جێگیركراون.ررررررر