سەردێر

ماددەكانی بەشەخۆراكی ئەم مانگە ئاشكراكران

خەڵك-
وەزارەتی بازرگانی عێراق ئاشكرای دەكات، كە دەستیان كردووە بە دابەشكردنی سێیەمین سەبەتەی خۆراكی و بەڕێوەبەری كۆمپانیای دابەشكردنی خۆراكی سلێمانی دەڵێت: “6 ماددە لە بەشەخۆراك دابەش دەكرێت”.

عەلا جبوری، وەزیری بازرگانی عێراق لە بەیاننامەیەكدا ئاماژەی بەوەكردووە، كۆمپانیای گشتی بازرگانی خۆراك لە بەغدا و پارێزگاكانی دیكە لە دوێنێوە دەستیان كردووە بە وەرگرتنی ماددەكانی بەشەخۆراك، كە لە چوارچێوەی سێیەمین سەبەتەی خۆراكی دابەش دەكرێت.

ڕاشیگەیاندووە، ماددەكان بە كوالێتی باشن و داوا لە هاووڵاتیان دەكەین سەردانی بریكارەكانی خۆراك بكەن بۆ وەرگرتنی بەشەخۆراكەكانیان.

لای خۆشیەوە، شەوكەت محەمەد، بەڕێوەبەری كۆمپانیای دابەشكردنی خۆراكی سلێمانی بۆ (خەڵك) ڕایگەیاند، دابەشكردنی خۆراك بەردەوامە و لە چەند ڕۆژی داهاتووشدا دەست بەدابەشكردنی سەبەتەی خۆراكی هاووڵاتیان دەكەین، كە بەشی سێهەمی سەبەتەی خۆراكە بۆ مانگی 11ی ئەمساڵ.

ڕاشیگەیاند، بۆ ئەم مانگە سەبەتەی خۆراك لە 6 ماددەی خۆراكی پێك دێت، كە بریتین لە(برنج و شەكر و زەیت و دۆشاو و فاسۆلیا و لەتكە نۆك) و هەندێك مانگیش دەبێتە نیسك، ئەمە جگە لە بەشە ئاردی مانگانەی هاووڵاتیان.