سەردێر

“ئەگەر دەسەڵات ژیرانە مامەڵە نەكات، بازنەی خۆپیشاندانەكان فراوانتر دەبن”

خەڵك
چاودێرێكی سیاسی لەبارەی دۆخی ئێستای هەرێمی كوردستانەوە بۆ (خەڵك) دەدوێت و دەڵێت، ئەگەر دەسەڵات بەشێوەیەكی تەندروست مامەڵە نەكات بازنەی خۆپیشاندانەكان فراوانتر دەبن، دەشڵێت پێویستە خۆپیشاندەران و هێزە ئەمنییەكانیش لە ئاستی بەرپرسیارێتیدا بن.

د.هیوا سەید سەلیم، چاودێری سیاسی بە (خەڵك)ی ڕاگەیاند، ئەم بارودۆخەی ئێستا هەیە كوردستان بەرەو خراپتر دەبات لەبەر ئەوەی دەسەڵات ئامادە نییە گوێ‌ لە هیچ بزوتنەوەیەكی ناڕەزایی بگرێت.

 

دەشڵێت، خوێندكاران ژیانێكی سەخت بەڕێدەكەن، دەبوو حكومەت خۆی دەستپێشخەر بوایە لە گێڕانەوەی ئەو دەرماڵەیەی كە لە 2014 ەوە لێی سەندونەتەوە، پێشتر بە یاسا دراوە بە خوێندكاران.

ئاماژە بە ئەوەشدەكات، كاتێك بەو شێوازە پۆلیسیانە مامەڵە لەگەڵ خوێندكار دەكرێت، دەبێت بزانرێت كە ئەوهەڵسوكەوتە لە ڕابردوودا سەری زۆرێك لە ڕژێمە بە دەسەڵاتدارەكانی ناوژەكەی خواردووە، وەك چۆن بەهاری عەرەبیمان بینی لە میسڕ و تونس كە هێز نەیتوانی ڕێگری لە ناڕەزایی جەماوەر وەر بگرێت، دەبێت دەسەڵاتدارانی هەرێم پەند لەو ڕژێمانە وەربگرێت.

 

وتیشی، دەبێت هەردوولا لە ئاستی بەرپرسیارێتیدا بن هەم دەربڕینی ناڕەزاییەكان بەشێوازێكی مەدەنی و دیموكراسی بێت و هەم هێزە ئەمنییەكانیش بەشێوەیەكی دروست مامەڵە لەگەڵ نارەزاییەكاندا بكەن و وەكو خاوەن ماف سەیری ئەو كەسانە بكەن كە دێنە سەر شەقام نەك وەك خەڵكێك كە تۆمەتی ئەوەی ئاڕاستە بكرێت كە گوایە كەسێك لە پشتی خۆپیشاندەرانە وەكو كەسوكاری خۆیان.

 

ئەو چاودێرە دەشڵێت، دەزگا ئەمنییەكانیش وەك و هاووڵاتییانی دیكە مافیان خوراوە و پارەی پاشەكەوتیان لەلای حكومەتە، با لەوە زیاتر لەكە نەكەوێتە سەر دیموكراسیەتی هەرێمی كوردستان.

 

باس لە ئەوەشدەكات، ئەگەر دەسەڵات مامەڵەیەكی دروست و واقیعیانە و ژیرانە لەگەڵ داخوازییەكاندا نەكات، ناڕەزایەتییەكان فراوان دەكرێن بۆ چین و توێژەكانی دیكە، پێشتر مامۆستایان هاتنە سەر شەقام ئێستا خوێندكاران دواتریش چین و توێژەكانی دیكە دەچنە سەرشەقام لە بەرامبەر نەبوونی خزمەتگوزارییەكان، بۆیە دەبێت دەسەڵات گوێ‌ بگرێت لە دەربڕینی ناڕەزایەتییەكان و چارەسەری كێشەكان بكات.

ئاماژە بە ئەوەشدەكات، دەبێت پەرلەمانی كوردستان لەم دۆخەدا ڕۆڵی هەبێت وەك بزوتنەوەیەكی فشار لەسەر دەسەڵاتی جێبەجێكردن، بتوانن لە ئاستی ئەو متمانەیەدا بن كە خەڵك پێیداون و پشتیوانی لە داوا ڕەواكانیان بكەن.

 

ئەمە لە كاتێكدایە ئەمڕۆ بۆ جاری چوارەم خوێندكارانی زانكۆ و پەیمانگاكان خۆپیشاندانیان ئەنجامداو چەند داواكارییەكیان هەیە و سەرەكی ترینیان وەك خۆیان ئاماژەی پێدەكەن گەڕاندنەوەی دەرماڵەكانیانە كە لە ساڵی 2014 ەوە حكومەتی هەرێمی كوردستان ڕایگرتووە.