سەردێر

نرخی نەوت بەرزبۆوە

خەڵك-
وێڕای ڕاگەیاندنی پلانێكی تۆكمە لەلایەن ویلایەتە یەكگرتووەكان لەگەڵ گەورە بەرهەمهێنەرانی نەوتی خاو بۆ ڕاكێشانی بڕی زیاتری یەدەگی ستراتیژی و خستنەبازاڕی لەپێناو دابەزینی نرخەكەی، ئەمڕۆ سێ‌ شەممە نرخی نەوت ڕووی لە بەرزبوونەوە كرد.

بەپێی زانیارییەكانی ماڵپەڕی (بلۆمبێرگ)، نرخی بەرمیلێك نەوتی ئەمریكایی خۆرئاوای تكساس بەڕێژەی 0.25% بەرزبۆوە و گەیشتە 76.94 دۆلار، نرخی بەرمیلێك نەوتی خاوی برێنتیش بەڕێژەی 0.70% بەرزبۆوە و گەیشتە 80.26 دۆلار.

ئەمڕۆ كۆشكی سپی ڕایگەیاند، ویلایەتە یەكگرتووەكان 50 ملیۆن بەرمیل نەوت لە یەدەگی نەوتی ستراتیژی لەماوەی چەند مانگی داهاتوودا دەخاتە بازاڕەوە.

بە هەمان شێوە هیندستان ئاماژەی بە خستنەبازاڕی 5 ملیۆن بەرمیلی یەدەگی ستراتیژی وڵاتەكە كرد، حكومەتی ژاپۆنیش بڕیاریدا بڕێكی زیاترى نەوت لە یەدەگی ستراتیژی وڵاتەكەی بفرۆشێت.

لەئێستادا جۆ بایدن سەرۆكی ئەمریكا سەركردایەتی هەوڵێكی ڕێكخراو دەكات بۆ خستنەبازاڕی نەوتە عەمباركراوەكان، لەپێناو دابەزینی نرخی نەوت لە بازاڕەكانی جیهاندا.